У Італіі існуе традыцыя перад Новым годам пазбаўляцца ад старых рэчаў. Мяркуючы па звалцы ў канцы вуліцы Веры Харужай у райцэнтры, пастаўчане гэта робяць кожны дзень. Тут знаходзяцца кантэйнеры для звычайных бытавых адходаў, а таксама асобныя — для паперы, шкла, пластыку. Для буйнагабарытнага смецця абсталявана спецыяльная пляцоўка, абгароджаная з двух бакоў бетоннымі плітамі. Усё, што не патрэбна, сюды вывозяць людзі ці не з паловы горада і суседніх вёсак. Канапы, крэслы, сталы, шафы, матрацы, тэлевізары, унітазы, ракавіны, посуд, балконныя рамы, будаўнічае смецце, упакоўкі ад новай бытавой тэхнікі, пустазелле з агародаў, дрот, горы паношанага адзення. Колькасць выкінутага апісаць цяжка. Такая карціна назіраецца кожны тыдзень.
Звалка добра бачная з аб’язной дарогі. Непрыемна праязджаць і хадзіць каля яе жыхарам вуліц Някрасава, Меліярацыйнай, Веры Харужай, Ціхана. Часта вецер прыносіць смецце да бліжэйшых дамоў, разносіць па наваколлі. Вывозяць яго адсюль звычайна раз або два на тыдзень. Таму, можа, кіраўніцтву УП ЖКГ варта перагледзець графік з тым разлікам, каб адходы не складзіраваліся на вялікай плошчы.
Лічу таксама, што прэтэнзіі тут не толькі да камунальнікаў, але і да саміх грамадзян, якія не сартуюць смецце: бытавое кідаюць разам з буйнагабарытным. Вось і на гэтым здымку добра бачна, што пластыкавая тара сваё месца знайшла не ў кантэйнеры для пластыку, а валяецца на пляцоўцы. Шмат пакетаў, напоўненых бутэлькамі з-пад алею, газіраваных напіткаў, упакоўкамі ад малака, смятаны і іншага. А месца ім, канешне ж, у кантэйнеры. Парадак абавязаны наводзіць работнікі УП ЖКГ, а не смеціць — мы з вамі.
Анна Анішкевіч
Фота Людмілы Зелянкевіч
