Нядаўна ў рэдакцыю райгазеты патэлефанавала пастаўчанка Жанна Мацеша, якая праходзіла ў паліклініцы ЦРБ вадзіцельскую камісію. Жанчыну не задавальняе яе арганізацыя. І адна з прэтэнзій заключаецца ў тым, што на камісію адводзіцца ўсяго дзве гадзіны — з 14.00 да 16.00.
— Як паспець за такі кароткі час абысці ўсіх урачоў? — задае рэзоннае пытанне аўтааматарка. — Тым больш што нарколаг знаходзіцца па вуліцы Вакзальнай. А гэта далёка ад паліклінікі, і хутка дабрацца да яго можна толькі на ўласным транспарце або таксі. Няўжо нельга зрабіць так, каб падчас камісіі і прафмедагляду ён вёў прыём у ЦРБ? І чаму не дазваляецца прайсці некаторых спецыялістаў у іншыя дні, як было раней?
Таксама Жанна Казіміраўна не разумее, чаму працэдурны кабінет пачынае работу не ў 8 гадзін, а ў 8.30, і там толькі адзін лабарант.
— Каб здаць кроў на аналіз, трэба гадзінамі сядзець у чарзе пад кабінетам разам з хворымі людзьмі, якія кашляюць, чхаюць, — кажа яна.
Зварот нашай чытачкі мы адправім на рэагаванне кіраўніцтву УЗ «Пастаўская цэнтральная раённая бальніца». А пасля атрымання адказу абавязкова апублікуем яго на старонках «ПК».
Падрыхтавала Алена Шапавалава
