Імя Марыны Кавалёнак добра вядомае на Пастаўшчыне аматарам паэзіі. Яна згуртавала вакол сябе мясцовых творцаў, узначальвае аматарскае літаратурнае аб’яднанне пры раённым Цэнтры культуры і народнай творчасці. Яе вершы часта друкуюцца на старонках «Пастаўскага краю». А месяц назад у цэнтральнай раённай бібліятэцы адбылася прэзентацыя зборніка яе вершаў «Імгненні». Ён пяты па ліку ў творчай скарбонцы аўтара.
— Усе сюжэты вершаў — з жыцця, — гаварыла Марына Адамаўна. — А яно ў мяне насычанае. Падзеі, сітуацыі, пачуцці, эмоцыі — усё ператвараецца ў вершаваныя радкі.
Марына працуе прыёмшчыкам заказаў і швачкай у райбыткамбінаце, абслугоўвае ў тым ліку і жыхароў сельскай мясцовасці — Курапольскага сельсавета. Да работы адносіцца з высокай адказнасцю, да сям’і — з любоўю. У яе з мужам Аляксандрам трое дарослых сыноў. А яшчэ яна аддае пяшчоту свайго сэрца старэнькай маці.
Марына не толькі піша добрыя вершы, але і артыстычна іх дэкламуе са сцэны. Нездарма ж журы «Віцебскага лістапада» мінулай восенню адзначыла яе адпаведным дыпломам. Адзначаліся дыпломамі яе вершы і ў конкурсах «Браславская обитель». У планах Марыны Кавалёнак — трапіць сёлета з удзельнікамі літаб’яднання на паэтычную імпрэзу на «Славянскім базары ў Віцебску».
Фаіна Касаткіна
