Прыцягнуць моладзь у сельскую гаспадарку — стратэгічная задача для кіраўніцтва раёна. З гэтай мэтай у мінулую суботу ў СШ №1 прайшоў кірмаш мэтавай падрыхтоўкі.
У актавай зале сабраліся вучні аграрных класаў школ раёна. З прывітальным словам да іх звярнуўся першы намеснік старшыні райвыканкама Генадзій Лютынскі, які ў свой час скончыў Віцебскую ветэрынарную акадэмію, прайшоў шлях ад ветурача да начальніка ўпраўлення па сельскай гаспадарцы і харчаванні райвыканкама. Ён адзначыў, што за апошні час значна змяніліся і ўмовы паступлення ў ВНУ і ўмовы работы ў сельскай гаспадарцы.
Пастаўшчына, як і ўвесь Прыдзвінскі край, лічыцца зонай рызыкоўнага земляробства. Але і ў нас ёсць сельгаспрадпрыемствы, дзе ўкаранёны перадавыя тэхналогіі, працуюць высакакласныя спецыялісты, якія дабіваюцца высокіх вынікаў як у раслінаводстве, так і ў жывёлагадоўлі. Выпускнікі школ маюць магчымасць заключыць мэтавы дагавор на вучобу з любой гаспадаркай раёна, які гарантуе даплату да стыпендыі, першае рабочае месца і іншае.
Дэкан аграмеханічнага факультэта БДАТУ Віктар Лоўкіс, дацэнт кафедры генетыкі і развядзення сельскагаспадарчай жывёлы Віцебскай дзяржаўнай акадэміі ветэрынарнай медыцыны Надзея Фурс, выкладчык аграрнага каледжа гэтай навучальнай установы Вікторыя Лук’янава, намеснік дырэктара па вучэбна-вытворчай рабоце Пастаўскага дзяржкаледжа Наталля Лятоха падрабязна расказалі пра спецыяльнасці, якія прапануюць іх установы, умовы паступлення, навучання, пражывання. Дырэктар ААТ «Сцяг Перамогі-агра» Максім Чагарын расказаў пра сваю вучобу ў пастаўскім каледжы, БДАТУ, работу ў сельскай гаспадарцы.
Затым усе ахвотныя маглі задаць пытанні прадстаўнікам навучальных устаноў.
Анна Анішкевіч
