У 20-ы раз у Міёрскім цэнтры культуры і народнай творчасці прайшоў фестываль каляднай песні «Зорка Бэтлеема», які з’яўляецца найвыразнейшым сведчаннем веры ў Хрыста.
На юбілейнае мерапрыемства сабралася шмат музычна і артыстычна адораных удзельнікаў, каб разам святкаваць Нараджэнне Езуса і праслаўляць Бога праз музыку і песні. Калядныя музычныя нумары падрыхтавалі творчыя калектывы з Полацка, Наваполацка, Варапаева, Пастаў, Глыбокага і Міёр. Удзельнікі імкнуліся як мага лепш прадставіць сваё майстэрства. Яны спявалі гуртам і сола, ігралі на музычных інструментах. Выступленні выканаўцаў прысвячаліся адвечнай тэме — міласэрнасці і Нараджэнню Збаўцы. Конкурс праходзіў у атмасферы хрысціянскай радасці.
Вялікую насычаную праграму разам з сястрой Канстанцыяй і арганісткай Веранікай Кузьміч падрыхтавалі 12 дзяцей сярэдняй узроставай групы з пастаўскай парафіі Святога Антонія Падуанскага.
Парадавалі гледачоў прадстаўнікі парафіі Святога Арханёла Міхала з Варапаева. Паліна Буйноўская, Яна Антух і Валерыя Рыжэвіч выканалі песню «Царь родился», Кіра Мацкевіч і Мілана Курыловіч — «Даўно ў мястэчку Бэтлеем», а Ульяна Казаровец — «Каралі тры ішлі».
Пакуль журы падводзіла вынікі конкурсу, забаўляльную праграму з танцамі зладзіла моладзь з Варапаева пад кіраўніцтвам сястры Марыяны Гроць.
Ганаровым госцем свята быў біскуп Алег Буткевіч. Ен падзякаваў канкурсантам за высокі ўзровень выступлення, а арганізатарам і гаспадарам фестывалю — за падрыхтоўку мерапрыемства. З рук біскупа пераможцы атрымалі дыпломы, а ўсе ўдзельнікі — падарункі ад дабрачыннага каталіцкага таварыства «Карытас» Віцебскай дыяцэзіі.
У намінацыі «Сола» дыпломамі II ступені адзначаны пастаўчанка Аляксандра Шырокая і Ульяна Казаровец з Варапаева.
Анна Анішкевіч
