21 студзеня ў нашай краіне стартавала датэрміновае галасаванне. Большасць грамадзян прыйдуць на ўчасткі не першы раз. Але ёсць сярод іх і тыя, для каго электаральная кампанія стане дэбютнай. У нашым раёне такіх 200 чалавек.
На ўчастку для галасавання №5, размешчаным у памяшканні Пастаўскага дзяржаўнага каледжа, у аўторак да людзей старэйшага пакалення далучыліся навучэнцы, якія пражываюць у інтэрнаце. Тыя, хто галасаваў упершыню, атрымалі на памяць кнігу «Сімвалы суверэннай Беларусі», у якой сабраны матэрыялы пра дзяржаўныя і нацыянальныя сімвалы нашай краіны. А першы сакратар райкама БРСМ Анастасія Пятрова разам з валанцёрамі Яўгенам Сараем і Кірылам Гайлюном уручыла маладым выбаршчыкам майкі з лагатыпам «Мой голас першы».
20 студзеня Беларускі рэспубліканскі саюз моладзі даў старт рэспубліканскай акцыі для грамадзян, якія галасуюць упершыню, — «Мой голас першы». Яна накіравана на павышэнне электаральнай актыўнасці і напамінае маладым людзям, якім споўнілася 18 гадоў, пра іх канстытуцыйны абавязак і грамадзянскую адказнасць. Далучыліся да акцыі і на Пастаўшчыне. На ўсіх участках для галасавання працуюць валанцёры, якія ўручаюць брэндавыя футболкі з назвай акцыі тым, хто ўпершыню галасуе.
— Прыемна ўсведамляць, што мы дараслі да такога моманту, калі можам удзельнічаць у палітычным жыцці краіны, вырашаць яе далейшы лёс — аддаваць свой голас за кандыдата ў Прэзідэнты. Таму і адправіліся на ўчастак для галасавання не ў нядзелю, а датэрмінова. Атрыманыя падарункі застануцца прыемным напамінам пра сённяшні дзень, — гаварылі навучэнцы Саша Царова, Улада Хадалёнак, Мілена Жыдко.
Дзяўчаты вучацца на 3-м курсе па спецыяльнасці «Бухгалтарскі ўлік, аналіз і аўдыт». Прыехалі ў наш каледж з Маладзечна, Глыбокага і Мядзела. Адзначылі, што ім падабаюцца Паставы, усё задавальняе ў навучальнай установе.
— Мне з дзяцінства прывівалі любоў да малой радзімы, вучылі быць адказнай, сумленнай, — расказвала Улада Хадалёнак. — З мамай не аднойчы хадзіла на выбары, назірала, як яна запаўняе бюлетэнь, апускае яго ў скрыню для галасавання. Самой хацелася хутчэй вырасці і прагаласаваць самастойна. Сёння мая мара ажыццявілася.
Мікіта Васільеў родам з Занарачы. Выбраў для сябе спецыяльнасць тэхніка-механіка. У інтэрнаце пасяліўся з хлопцамі з Шаркаўшчыны і Мядзела.
— Перад тым як прыйсці на ўчастак, азнаёміўся з алгарытмам галасавання, — апавядаў. — Мы, маладыя, — будучыня краіны. Для нас створаны ўсе ўмовы для самарэалізацыі ва ўсіх сферах дзейнасці. Таму лічу, што і мы не павінны быць раўнадушнымі да лёсу сваёй краіны, заставацца ў баку ад такой значнай грамадска-палітычнай падзеі. Тут важны кожны голас. Разам мы фарміруем лёс Беларусі.
Навучэнцы каледжа ўпэўненыя, што кіраваць дзяржавай павінен чалавек, які па-сапраўднаму любіць Беларусь, адданы ёй і народу, думае на перспектыву, валодае навыкамі кіравання ў крызісных сітуацыях, здольны захаваць мір.
Анна Анішкевіч
