Гэтымі днямі навагодні настрой адчуваецца ва ўсім, што нас акружае і адбываецца навокал. У апранутых у рознакаляровыя шары і гірлянды ёлках у розных раёнах горада, ілюмінацыі на вуліцах, на вокнах дамоў і фасадах будынкаў, у навагодніх інсталяцыях тут і там. Разнастайных дабрачынных акцыях, у якіх прымаюць удзел усе — ад школьнікаў да чыноўнікаў самага высокага рангу. Перадсвяточнай мітусні на кірмашах і ў магазінах, прыпраўленай водарам мандарынаў.
Але калі большасць з нас пагружаецца ў атмасферу любімага ўсімі свята ў сярэдзіне снежня, то ў Пастаўскім раённым цэнтры дзяцей і моладзі яна пачынае панаваць яшчэ ў лістападзе, калі аб’яўляюцца рэспубліканскія конкурсы «Калядная зорка», «ТэхнаЁлка» і «Лёд. Кветкі. Фантазія». У іх разам з РЦДМ прымаюць удзел усе школы раёна. У першых чыслах снежня педагогі цэнтра выбіраюць найлепшыя работы і адпраўляюць іх на абласныя этапы творчых спаборніцтваў, а астатнія афармляюць у выставу дзіцячай творчасці «Навагодні настрой». Сёлета яе адкрыццё адбылося 16 снежня разам са стартам навагодняй дабрачыннай акцыі «Нашы дзеці».
— У гэтым годзе ўстановы адукацыі Пастаўшчыны праявілі надзвычай высокую актыўнасць у конкурсах, — расказвала намеснік дырэктара цэнтра Таццяна Шумуліанене. — Калі ў «Каляднай зорцы» пастаянна шмат удзельнікаў, то на «ТэхнаЁлку» раней паступала ўсяго некалькі работ. Сёлета ўдзел у ёй прынялі ўсе школы, прычым прадставілі цікавыя вырабы. Таксама вельмі актыўна дасылалі работы на выставу-конкурс «Лёд. Кветкі. Фантазія». Там была вялікая колькасць намінацый, і ўсе яны звязаныя з прыродным матэрыялам.
Сёння ўжо падведзеныя вынікі абласных этапаў двух творчых спаборніцтваў і вядомыя пераможцы. Сярод іх ёсць і пастаўчане. Так, у «ТэхнаЁлцы» дыпломаў ІІІ ступені ўдастоены: у намінацыі «Калядная кампазіцыя» — навучэнка СШ №4 імя В. Ф. Франтова Ульяна Пучынская (педагог — Аксана Аскірка), «Дызайн-ёлка» — прадстаўніца Лынтупскай СШ Кацярына Асіповіч (педагог — Наталля Раманоўская). У намінацыі «Святочныя ўпрыгажэнні» дыпломам ІІ ступені ўзнагароджана Вераніка Філь, якая займаецца ў РЦДМ, у аб’яднанні па інтарэсах «Мастацкі роспіс» пад кіраўніцтвам Марыны Кавальскай. Яе работа адпраўлена на заключны этап конкурсу.
У «Каляднай зорцы» ў нашых школьнікаў сёлета няма першых месцаў. Затое ажно пяць дыпломаў ІІІ ступені. Тры з іх — у прадстаўнікоў раённага цэнтра дзяцей і моладзі. У намінацыі «Зімовыя святы Беларусі» прызёрам стала Лізавета Татыржа (арт-студыя «Юныя дызайнеры», кіраўнік — Вольга Пякарская), «Сувенір-падарунак» — Дар’я Папова, Марыя Змітровіч і Дар’я Дубаневіч (школа мастацкіх рамёстваў «Саламяныя фантазіі», педагог — Таццяна Дзегцярук), «Навагодні персанаж» — Кіра Казаровец, Дар’я Краско і Дар’я Масальская (дызайн-студыя «Чароўны кручок», кіраўнік — Іна Багушэвіч). Яшчэ адзін дыплом у намінацыі «Навагодні персанаж» у навучэнкі СШ №1 Анастасіі Марціновіч, чыім педагогам з’яўляецца Святлана Сварцэвіч. А ў намінацыі «Жывёльны свет Беларусі» дыплома ўдастоены навучэнец Навадруцкай БШ Канстанцін Самковіч, які займаецца ў Фаіны Гінько.
Паралельна з названымі праходзіць абласны конкурс-акцыя «На добрую памяць», у якім таксама прымаюць удзел юныя пастаўчане. Іх найлепшыя вырабы затым выкарыстоўваюць у якасці падарункаў дзецям і дарослым. У гэтым конкурсе дыплом ІІІ ступені ў прадстаўніцы аб’яднання па інтарэсах «Гліняная майстэрня» (кіраўнік — Вікторыя Граблеўская) Кіры Казаровец.
Што да навагодняй атмасферы, то яе стварае не толькі названая вышэй выстава, дзе можна ўбачыць ўсемагчымыя ёлкі, Дзедаў Марозаў са Снягуркамі, самаробныя ёлачныя цацкі, анёлаў, гномаў, снегавікоў, аленяў і іншых персанажаў. Па-святочнаму ўбраныя ўсе кабінеты і калідоры цэнтра. А на вялізнай грыфельнай дошцы на другім паверсе ўстановы навучэнцы студыі выяўленчага мастацтва «Сяміцвецік» намалявалі крэйдай яшчэ адну ўпрыгожаную шарыкамі і гірляндамі ёлку з падарункамі пад ёй і віншавальным надпісам «З Новым годам!».
Алена Шапавалава
