Старажытны Полацк — калыска беларускай духоўнасці, пісьменства і дзяржаўнасці — 8 лістапада шчыра вітаў гасцей і ўдзельнікаў галоўнага свята хлебаробаў — фестывалю-кірмашу «Дажынкі-2024». Тут сабраўся залаты фонд аграпрамысловага комплексу Прыдзвінскага краю. Ганаровым госцем мерапрыемства стаў Прэзідэнт Рэспублікі Беларусь Аляксандр Лукашэнка.
Рэгіён павінен развівацца
— Я палічыў неабходным прыехаць сюды, каб пакланіцца вам нізка ў пояс за вашу працу, дабрыню, спагаднасць, а таксама за ваш патрыятызм, — гаварыў беларускі лідар. — Гэта вы — аснова нашага жыцця і аснова нашай бяспекі. Толькі дзякуючы вам мы сёння не ўцягнуліся ў нейкія войны, супрацьстаянні і канфлікты. Жывём хай не багата, але мірна — гэта галоўнае. Усё астатняе — у нашых руках. Вы — сапраўдныя патрыёты сваёй зямлі, якія прысвяцілі жыццё найвысакароднейшаму занятку — сялянскай працы. Вялікі вам дзякуй за працавітасць, прафесіяналізм, настойлівасць, што немалаважна для Віцебшчыны.
Віцебская вобласць мае свае кліматычныя асаблівасці, у тым ліку неспрыяльныя. Але не так усё дрэнна, калі параўнаць сітуацыю з іншымі краінамі: Нарвегіяй, Фінляндыяй, поўначчу Расіі, дзе земляробам даводзіцца працаваць у яшчэ больш складаных умовах. Пры гэтым Прэзідэнт заўважыў, што палова гаспадарак Прыдзвінскага краю паказвае нядрэнныя вынікі.
Сёлета хлебаробы Віцебшчыны намалацілі каля 900 тысяч тон збожжа. Але да сваёй базавай задачы — мінімум мільён тон, як акцэнтаваў увагу Прэзідэнт, — недацягнулі. Нядрэнна спрацавалі на кукурузе: плюс 100 тысяч тон да мінулага года. Па ўраджайнасці гэтай культуры выйшлі на 2-е месца ў краіне — атрымалі 90 цэнтнераў з гектара. А вось збожжавыя падвялі.
— Наш фронт — гэта эканоміка, а для вяскоўцаў — перш за ўсё хлебная ніва, — падкрэсліў Аляксандр Лукашэнка. — Хлеб ва ўсе часы быў самай цвёрдай «валютай». Менавіта таму вашы вынікі ў земляробстве — найважнейшы ўклад у забеспячэнне харчовай і ў цэлым нацыянальнай бяспекі.
Не абмінуў увагай Прэзідэнт і вырошчванне льну.
— Лён — наш нацыянальны сімвал, — гаварыў ён. — Яго выява ёсць і на дзяржаўным Гербе. Але справа не ў гэтым: Беларусь заўсёды была сярод сусветных лідараў па вырошчванні даўгунцу, вытворчасці прадукцыі з яго, а Віцебшчына — флагманам гэтай галіны.
За апошнія гады ўкладзены значныя сродкі ў мадэрнізацыю льнозаводаў, выведзены новыя сарты гэтай культуры, выпушчана спецыялізаваная тэхніка. А Аршанскі льнокамбінат з’яўляецца самым буйным у Еўропе і СНД.
У Віцебшчыны ёсць патэнцыял для развіцця. Кіраўнік дзяржавы падкрэсліў, што людзі ў гэтым рэгіёне павінны жыць: знайсці сваё месца і годную заработную плату, ім трэба стварыць добрыя ўмовы для працы.
Кульмінацыяй свята стала ўручэнне Прэзідэнтам высокіх узнагарод найлепшым аграрыям вобласці. Медаль «За працоўныя заслугі» атрымала галоўны аграном ААТ «Навасёлкі-Лучай» Алена Касцюк, а ветурач Пастаўскага малочнага завода Аляксей Дзіковіч — Падзяку Прэзідэнта. Алена Іосіфаўна ад імя ўзнагароджаных падзякавала Аляксандру Лукашэнку за ўвагу да людзей працы.
Вельмі прыемна, што на такім высокім узроўні ацэньваецца работа спецыялістаў жывёлагадоўчай галіны. Дзяржава аказвае значную дапамогу ў будаўніцтве жывёлагадоўчых комплексаў. Тры з іх у гэтым годзе будуць уведзены ў эксплуатацыю ў нашым раёне. У аграпрамысловым аб’яднанні, якое створана на базе Пастаўскага малочнага завода, утрымліваецца 20 616 галоў буйной рагатай жывёлы, з іх 7 500 — дойны статак. Для работы ў нас ёсць сучаснае абсталяванне, падабраўся дружны калектыў высокакваліфікаваных ветурачоў. Кожны з іх уносіць свой важкі ўклад у дасягненне поспехаў. Валавая вытворчасць малака на сельгаспрадпрыемствах, якія абслугоўваем, за 10 месяцаў бягучага года склала 26 420 тон. Прыбаўка да адпаведнага перыяду мінулага года — 1 845 тон.
Аляксей Дзіковіч
Да галоўных віноўнікаў свята — камбайнераў, вадзіцеляў, спецыялістаў, дырэктараў гаспадарак — звярнуліся таксама кіраўнік Адміністрацыі Прэзідэнта Беларусі Дзмітрый Крутой, старшыня Палаты прадстаўнікоў Нацыянальнага сходу Рэспублікі Беларусь Ігар Сергяенка, старшыні Віцебскага аблвыканкама і Федэрацыі прафсаюзаў Беларусі Аляксандр Субоцін і Юрый Сянько. Прывітальны адрас з нагоды фестывалю-кірмашу і надыходзячага прафесійнага свята — Дня работнікаў сельскай гаспадаркі і перапрацоўчай прамысловасці — накіравала аграрыям Віцебшчыны старшыня Савета Рэспублікі Нацыянальнага сходу Беларусі Наталля Качанава. У ім, у прыватнасці, сказана: «Хлеб для нашага народа з даўніх часоў з’яўляецца святыняй, сімвалам жыцця і дабра. Высокае майстэрства, адказнасць і любоў да роднай зямлі прадстаўнікоў шматлікіх прафесій АПК і перапрацоўчай прамысловасці Віцебшчыны, заснаваныя на багатых традыцыях, вопыце, ведах ветэранаў вытворчасці, садзейнічаюць павышэнню эфектыўнасці сельскай гаспадаркі, рашэнню задач сацыяльна-эканамічнага развіцця вобласці і нашай краіны».
Трымаюць планку!
Глядзела сёлетнія «Дажынкі» і ўспамінала 2002 год, калі свята працаўнікоў аграпрамысловага комплексу ў Полацку ладзілася ў першы раз. Прадстаўнічай тады была дэлегацыя Пастаўшчыны. А механізатар калгаса імя Суворава Часлаў Урбель па выніках рэспубліканскага спаборніцтва на жніве быў у ліку 12 найлепшых камбайнераў краіны. Яму і старшыні калгаса імя Дзяржынскага Полацкага раёна Фёдару Завадскаму быў аказаны гонар узняць флаг VI рэспубліканскага фестывалю-кірмашу працаўнікоў вёскі. Тады Прэзідэнт Беларусі Аляксандр Лукашэнка ўручыў Чаславу Урбелю ганаровы дыплом і ключы ад новай аўтамашыны. На 2-м месцы сярод пераможцаў рэспубліканскага спаборніцтва былі камбайнер гэтай гаспадаркі Сяргей Каралёнак і вадзіцель Васілій Ярмолаў.
Мінула 22 гады, а навасёлкаўцы па-ранейшаму трымаюць планку! Гаспадарцы прысуджана 2-е месца ў другой групе па нарыхтоўцы кармоў, і яна ўдастоена дыплома і прэміі ў памеры 8 000 рублёў. Узнагароду дырэктару сельгаспрадпрыемства Юрыю Шымчыку ўручыў Аляксандр Субоцін.
Ганаровай граматай Нацыянальнага сходу Рэспублікі Беларусь на сёлетнім свяце адзначана руплівая праца камбайнера гэтай гаспадаркі Генадзія Анкудовіча, які падчас уборачнай кампаніі 2024 года на КЗС-2124 першым у раёне і вобласці намалаціў 1 000 тон збожжа. А ўсяго на яго рахунку 1 825 тон зерневых, зернебабовых і рапсу.
Механізатар Юрый Гваздоў узнагароджаны Ганаровай граматай Адміністрацыі Прэзідэнта Рэспублікі Беларусь. Сельскай гаспадарцы ён прысвяціў 30 гадоў свайго жыцця. На працягу 20-ці дабіваецца высокіх вытворчых паказчыкаў на нарыхтоўцы кармоў. Пастаянна ў лідарах абласнога спаборніцтва. Сёлета на «Ягуары-850» нарыхтаваў 32 689 тон зялёнай масы, што на 1 809 тон больш, чым летась. Грамату перадавому механізатару ўручыў Дзмітрый Крутой.
На вопытных механізатараў раўняюцца маладыя. Бясспрэчным лідарам сярод маладых вадзіцеляў вобласці на перавозцы збожжа ў другой групе стаў Аляксандр Дунец, які да прызыву на службу ў рэзерве паспеў перавезці больш за 1 000 тон збожжа. А камбайнер Віктар Рогаў, намалаціўшы 2 571 тону збожжа, заняў 3-е месца ў абласным спаборніцтве сярод камбайнераў другой групы.
Многія з прадстаўнікоў улады ўпаміналі на «Дажынках» ААТ «Хацілы-агра», якому па выніках абласнога спаборніцтва сярод сельскагаспадарчых арганізацый на ўборцы ўраджаю зерневых і зернебабовых культур прысуджана 2-е месца ў другой групе. Дырэктар Вячаслаў Крыштафовіч прымаў віншаванні і ўзнагароду ад Аляксандра Субоціна.
Сярод нашых землякоў, чыя добрасумленная і шматгадовая праца адзначана на свяце, — апаратчыца пастэрызаванага малака Пастаўскага малочнага завода Таіса Яголда (заахвочана Федэрацыяй прафсаюза Беларусі пуцёўкай у санаторый «Лётцы») і механізатар Пастаўскага льнозавода Андрэй Маісееў (Ганаровая грамата Віцебскага аблвыканкама).
З размахам
Гандлёвыя рады, выставы рамеснікаў, экспазіцыі прадукцыі самых розных прадпрыемстваў вобласці, канцэртныя пляцоўкі разгарнуліся на многіх вуліцах Полацка. Тут прапаноўвалі смачныя каўбасы, разнасолы, стравы нацыянальнай кухні з бульбы, агародніну і садавіну. Шчыра запрашалі да сябе гасцінныя падворкі, у якіх панавалі добразычлівасць, вяселле. У тым ліку і пастаўскі, дзе можна было падзівіцца з хлебнага дрэва і пачаставацца спечаным хлебапёкамі Пастаўскага філіяла Віцебскага аблспажыўтаварыства па традыцыйных беларускіх рэцэптах хлебам. Забаўлялі гасцей работнікі Цэнтра культуры і народнай творчасці разам з удзельнікамі ансамбля народнай музыкі і песні «Заранка». Яны, дарэчы, выступалі і на «Дажынках-2002».
Бойка ішла дэгустацыя сыроў Пастаўскага малочнага завода. А колькі ахвотных было сфатаграфавацца з мадэллю ў сукенцы, зробленай з упаковак з-пад малака, кефіру, смятаны і інш.!
Шматлікіх людзей зацікавілі майстар-класы нашых майстроў Таццяны Петух і Алены Крывенькі. Яны вучылі вырабляць абярэгі, фігуркі і побытавыя прадметы з саломкі, рознага спадручнага матэрыялу. На традыцыйны конкурс караваяў і дажыначных снапоў свае вырабы прывезлі ўсе раёны вобласці. Што ні выраб — то шэдэўр! У канцэртнай праграме ўдзельнічалі найлепшыя творчыя калектывы Віцебшчыны. Парадавала сваім выступленнем і наша зямлячка Злата Ярашэвіч.
Анна Анішкевіч
