Напрыканцы красавіка фінальным турам чатырох у Гомелі завяршыўся сезон у мужчынскіх каманд 1-й лігі. Пры вострай канкурэнцыі пастаўскі «Атлант» заваяваў «бронзу». У пачатку кастрычніка ён зноў уступіць у барацьбу, але спачатку ўпершыню згуляе ў розыгрышы Кубка Беларусі па валейболе. Новы нацыянальны чэмпіянат распачнецца ў райцэнтры 19 кастрычніка.
Папярэдні сезон для нашых землякоў склаўся ўдала: з 3-га прамежкавага месца ім удалося трапіць у фінал. А заваяваныя ў 12-ы раз бронзавыя медалі — вельмі значнае дасягненне.
Што да новага нацыянальнага першынства, то айчынная федэрацыя валейбола запрасіла «Атлант» выступіць у розыгрышы Кубка Беларусі. І гэта стане своеасаблівай падрыхтоўкай нашай каманды да чэмпіянату Беларусі. Згуляюць пастаўчане ў першай групе «А». У ёй за дзве пуцёўкі ў рашаючы этап пазмагаюцца «Шахцёр» з Салігорска, брэсцкі «Заходні Буг» і гродзенскі «Легіён». З імі нашы згуляюць двойчы на турах, якія пройдуць па кругавой сістэме, — у Салігорску і на Гродзеншчыне.
У чарговым першынстве 1-й лігі згуляюць 5 каманд. У Паставах пройдзе ажно 8 матчаў: каманды згуляюць паміж сабой па чатыры разы кожная. Яны правядуць спараныя сустрэчы ў выхадныя. Усяго «Атлант» чакаюць 16 паядынкаў. У фінал выйдуць 4 найлепшыя каманды.
Чакаецца, што сапернікі будуць моцныя, у складзе іх каманд згуляюць ігракі з вышэйшай лігі. Тым не менш пастаўчане нацэленыя на годны вынік.
У заяўцы нашай каманды пакуль 16 ігракоў. Яе павінны ўзмацніць распасоўшчык Уладзімір Юзвовіч і майстар спорту, дыяганальны Аляксей Рабека, які пагуляў на міжнароднай арэне. Касцяк каманды захаваўся.
Чэмпіянат краіны завершыцца 11 мая.
Уладзімір Шык
