Чэмпіянат Беларусі па футболе
Найлепшы матч сезона
ФСК «Паставы»–ФК «Сянно» – 5:1
Год назад пастаўчане і ФК «Сянно» вялі паміж сабой вострую барацьбу за «бронзу» ажно да заключнага тура. Тады на гарадскім стадыёне зафіксавалі нічыйны вынік — 0:0, а на фінішы пастаўчане сталі бронзавымі прызёрамі.
У чарговым супрацьстаянні ішоў адкрыты для абедзвюх каманд футбол на вялікіх хуткасцях да самага фінальнага свістка. Заўзятары актыўна падтрымлівалі нашу каманду, якая сёлета правяла найлепшы матч з моцным сапернікам. Праўда, спачатку наперад пайшлі сенненцы. На 5-й хвіліне наш варатар Андрэй Чашун справіўся з небяспечным ударам і ў далейшым гуляў упэўнена. На сваёй палове поля ў абароне пастаўчане дзейнічалі надзейна, падстрахоўваючы партнёраў, і паступова завалодалі гульнявой перавагай. У канцоўцы першага тайма яны двойчы дабіліся поспеху.
Спачатку апорнік Кірыл Каралёнак на 41-й хвіліне тэхнічна адправіў мяч у сетку над варатаром. Перад свістком на перапынак Кірыл па-майстэрску ўварваўся ў штрафную, абыграў абаронцу і аддаў пас капітану Андрэю Вілейту — 2:0. У другім тайме сенненцы актывізаваліся, каб адыграцца. Гульня абвастрылася, пайшла на сустрэчных курсах. Пасля гадзіны барацьбы матч у спакойнае рэчышча мог перавесці Кірыл Каралёнак. Ён зарабіў пенальці, сам стандарт прабіў, але побач са штангай. Акрылены сапернік пайшоў на штурм, а нашы адказалі двума стрэламі ў штангу.
Канцоўка матча аказалася багатай на яркія моманты. Наш цэнтрфорвард Андрэй Вілейта на 75-й хвіліне забіў гол — 3:0. Сапернік тут жа атрымаў права на пенальці, але паўабаронца Арцём Канаплёў не трапіў у вароты. Пастаўчане адказалі імклівай контратакай, якую прыгожым ударам завяршыў Уладзімір Камісарчук — 4:0. За 3 хвіліны да заканчэння гульні сапернік ударыў у перакладзіну, а на дабіванні розніцу ў ліку скараціў Яўген Кулік. У дадатковы час канчатковую кропку ў матчы паставіў Кірыл Каралёнак.
Буйную прыгожую перамогу дома атрымалі Чашун (Бяляўцаў), Маршын, Голубеў, Хараў, Камісарчук, Ясюковіч (Курыловіч), Пучынскі (Цыўнель), Жылевіч, Кундра (Мядзведзеў), Каралёнак, Вілейта (к).
14 верасня на стадыёне ПМЦ пастаўчане правядуць перанесены матч з «Гарадоцкімі львамі», затым іх чакае выезд у Віцебскі раён.
Уладзімір Шык
