Рэштку лета – на веласіпедзе — яго Злата Ярашэвіч атрымала ў падарунак ад Пастаўскага раённага выканаўчага камітэта.
Прозвішча Златы вядомае не толькі на Пастаўшчыне, але і далёка за межамі Беларусі. 14-гадовая таленавітая дзяўчына са Старога Двара — пераможца розных абласных, рэспубліканскіх і міжнародных музычных конкурсаў. Нядаўні поспех — дыплом трэцяй ступені на дзіцячым конкурсе выканаўцаў эстраднай песні ў рамках міжнароднага фестывалю мастацтваў «Славянскі базар у Віцебску».
Уручаючы веласіпед, начальнік аддзела культуры райвыканкама Ірына Лойка падзякавала Злаце за яркае выступленне на фестывалі, мэтанакіраванасць, а бацькам — за садзейнічанне ў развіцці таленту дачкі, пажадала новых поспехаў.
Пра веласіпед дзяўчына марыла даўно. Праўда, як прызнаецца, у навучальным годзе катацца на ім часу будзе няшмат. Акрамя вучобы ў агульнаадукацыйнай школе, Злата некалькі разоў на тыдзень ездзіць на заняткі ў Нацыянальны цэнтр музычнага мастацтва імя Уладзіміра Мулявіна ў Мінску, з’яўляецца студэнткай Акадэміі Ігара Крутога ў Маскве. А яшчэ захапляецца маляваннем, посткросінгам, вывучае замежныя мовы, любіць чытаць. І ўсё ж рэштку сёлетняга лета правядзе на веласіпедзе.
Анна Анішкевіч
