Кубак рэгіёнаў беларусі па футболе
Трафей зноў у фаварыта
ФСК «Паставы» – ФК «Міёры» – 2:5
Рашаючы матч абласнога кубкавага турніру стаў галоўным у мінулыя выхадныя, калі ў Прыдзвінні праходзіла шмат іншых сустрэч. Цікавая гульня з мноствам галявых момантаў трансліравалася ў прамым эфіры. З абодвух гарадоў у Полацк прыехалі вялікія групы прыхільнікаў, каб падтрымаць сваіх футбалістаў. Добра арганізаваны паядынак пераўтаварыўся ў прыгожае спартыўнае свята, якое парадавала многіх. Сапернікі выставілі самыя баяздольныя склады, нашы адразу пасля стартавага свістка смела пайшлі наперад. Перад гэтым на выездзе ў Міёрах яны на роўных згулялі з вельмі моцным калектывам, а часам і пераўзыходзілі яго.
Аднак фінал ёсць фінал. Міёрцы — а фактычна гэта зборная вобласці з былых прафесіяналаў і расійскіх легіянераў — у патрэбны момант паказалі сваё майстэрства. Сапернік змог адчувальна прыбавіць, згуляць на класе. Ён справіўся з націскам нашых, які завяршыўся небяспечным стрэлам Віталя Жылевіча над перакладзінай. На 10-й хвіліне міёрцы ўзорна падалі вуглавы, і іх капітан — цэнтральны абаронца Ігар Чарняўскі — ударам галавой адкрыў лік. Пакуль нашы прыходзілі ў сябе, апаненты правялі прарыў на іншым флангу. Форвард Яўген Лебедзеў абыграў апекуна і з блізкай адлегласці адправіў мяч ў сетку — 0:2.
Тут жа наша каманда ледзь не адыгралася. На жаль, убойны стрэл са штрафнога ў выкананні Кірыла Каралёнка адбіла штанга, а з паўторным ударам Аляксандра Звяругі на дабіванні справіўся шматвопытны варатар саперніка. Барацьба на полі ўспыхнула з новай сілай. На 21-й хвіліне чарговая атака міёрцаў завяршылася трэцім узяццем нашых варот. Да гонару пастаўчан, яны ў крытычнай сітуацыі не здаліся, змагаліся да канца. Перад перапынкам розніцу ў ліку ледзь не скараціў Герман Чалей, але пасля яго стрэлу мяч праляцеў побач са штангай. У другім тайме сапернік крыху супакоіўся, а нашы паспрабавалі адыграцца.
Пасля гадзіны барацьбы з трэцяй спробы запасны атакуючы паўабаронца пастаўчан Андрэй Вілейта з ювелірнай перадачы Германа Чаляя дабіўся свайго — 1:3. Аднак у той дзень спартыўнае шчасце было на баку больш моцнай каманды. Былы распасоўшчык БАТЭ Філіп Рудзік з невідавочнага пенальці зноў павялічыў лік на табло. У канцоўцы каманды абмяняліся ўзяццем варот: спачатку вызначыўся рэзервіст міёрцаў Віталь Смалякоў, а ўжо ў дадатковы час — паўторна Андрэй Вілейта. Нашы саступілі ў фінале. Пад апладысменты стадыёна гульню завяршылі Чашун (к, Мацкевіч), Касенка (Вілейта), Голубеў, Рогач (Хараў), Маршын, Звяруга (Пучынскі), Ясюковіч (Кундра), Каралёнак, Жылевіч (Пурлан), Камісарчук, Чалей.
Восенню міёрцы прадоўжаць барацьбу ўжо за адпаведны рэспубліканскі трафей. Аднак для пастаўскай маладой каманды выхад у абласны фінал — значны поспех. У мінулую нядзелю аднавілася барацьба ў нашай групе «А». Вынікі двух сустрэч наступныя: «Ураджай» (Віцебскі раён) — ФК «Сянно» — 2:5, «Газавік» (Віцебск) — «Гарадоцкія львы» — 3:1. У чэмпіянаце краіны ў 2-й лізе пастаўчан чакаюць у жніўні яшчэ выязныя матчы ў Полацку і Віцебску.
Уладзімір Шык
