Кубак рэгіёнаў Беларусі па футболе
Нашы – у фінале!
1/2 фіналу. «Дарожнік» (Орша)–ФСК «Паставы» – 1:1 (па пенальці – 3:4)
Паўфінальная серыя абласнога кубкавага турніру расцягнулася на два дні. Першы фіналіст выявіўся ў мінулую суботу ў Міёрах. Там мясцовая каманда — дзеючы ўладальнік Кубка вобласці — без праблем з лікам 4:2 выйграла ў «Гарадоцкіх ільвоў».
Лёс другой пуцёўкі вырашыўся на наступны дзень на аршанскім стадыёне «Лакаматыў». Кубкавая сустрэча пастаўчан з аршанцамі атрымалася напружанай і складанай для абедзвюх каманд, бо праходзіла пад дажджом. У такіх умовах кошт памылкі альбо абрэзкі мяча пры перадачы рэзка ўзрастаў. Першымі на 10-й хвіліне маглі вызначыцца нашы, але пасля стрэла Германа Чаляя мяч трапіў у штангу. Да перапынку сапернік таксама не рэалізаваў востры момант.
У другім тайме пастаўчане прыбавілі, сталі часцей валодаць мячом. Аднак на 52-й хвіліне бамбардзір аршанцаў Данііл Сянчыла трапным ударам з-за межаў штрафной пляцоўкі адкрыў лік — 1:0. Няўдача не збіла нашых з гульнявога рытму. Яны «заперлі» саперніка на яго палове поля, абрушылі град атак, падалі некалькі небяспечных вуглавых. У выніку на 72-й хвіліне пасля выверанага паса Уладзіміра Камісарчука цэнтральны нападаючы Герман Чалей стрэлам з развароту аднавіў раўнавагу — 1:1.
Па рэгламенце сёлета дадатковы час не прызначаўся і наймацнейшага вызначыла серыя пенальці. Сапраўдным героем у ёй стаў наш запасны варатар Андрэй Чашун, які адбіў першы ўдар саперніка. Перад гэтым пастаўчане стрэлілі ў перакладзіну. На шчасце, далей Раман Мядзведзеў, Герман Чалей, Аляксандр Звяруга і Максім Голубеў з 11-метровай кропкі прабілі бездакорна. Заключны ўдар аршанца зноў парыраваў А. Чашун і вывеў ФСК «Паставы» ў фінал Кубка Віцебскай вобласці. Дзе і калі наша каманда пазмагаецца з міёрцамі за трафей, хутка даведаемся, а ў Оршы поспеху дабіліся Бяляўцаў (Чашун), Касенка (Мядзведзеў), Рогач, Голубеў (к), Маршын, Ясюковіч (Зелянкевіч), Звяруга, Каралёнак, Жылевіч (Вілейта), Камісарчук, Чалей.
Уладзімір Шык
Фота Антона Чаляя
