Падчас школьных канікулаў адны дзеці любяць даўжэй паспаць, іншыя, прачнуўшыся, «завісаюць» у тэлефонах ці камп’ютарах. Хтосьці адпраўляецца на вадаём або ў адпачынак на мора, хтосьці чытае кніжкі. А 23 члены сельскагаспадарчага маладзёжнага атрада «Юнацтва» імя Героя Савецкага Саюза Фёдара Маркава працуюць на зернесушыльным комплексе ААТ «Навасёлкі-Лучай».
З першым сакратаром РК БРСМ Анастасіяй Пятровай накіроўваемся да студатрадаўцаў, каб пацікавіцца іх настроем. Па дарозе сустракаем хлопцаў на веласіпедах, што едуць у бок зернясклада. Пад сцяной вагавой, на якую заязджаюць машыны з зернем, — цэлы велапарк. Хлопцы і дзяўчаты гутараць паміж сабой. Аказваецца, у адных працоўная змена скончылася, іншыя прыехалі на яе заступаць.
— У студатрадзе падлеткі ад 14 да 17 гадоў, — расказвала інспектар аддзела кадраў гаспадаркі Вераніка Лібоза. — Працуюць яны ў тры змены па чатыры з паловай гадзіны. Работай маладых памочнікаў мы задаволеныя.
Анастасія Пятрова частуе дзяўчат і хлопцаў марозівам, а я з імі знаёмлюся. Марыя Скавародка, Злата Лібоза, Кірыл Коўзан, Арсеній Гайдукевіч, Дзяніс Рыхліцкі, Дзяніс Пронька, Аляксей Фёдараў — дзесяцікласнікі Навасёлкаўскай сярэдняй школы імя А. А. Валодзькі. Марыя Апанасевіч, Валерыя Лазнюха, Дзіяна Бугай, Вікторыя Лешчык, Дзяніс Дзярушкін перайшлі ў 11 клас. Аляксандра Грэцкая ўжо залічана на вучобу ў Полацкі дзяржаўны ўніверсітэт. Развіталіся са школай і Вікторыя Сафронава, Ксенія Макарэвіч. У Пастаўскім дзяржаўным каледжы вучацца Арцём Наско, Мікалай Мельнікаў, Захар Сымановіч, Ігар Ханяўка. Многія з іх на зернесушыльным комплексе не навічкі. А вось дзевяцікласнікі Ірына Шымко і Мікіта Цыбульскі прыглядаюцца, як працуюць тыя, хто мае вопыт. Студатрадаўцы сочаць за парадкам на пляцоўках для збожжа, падмятаюць іх, рыхтуюць складскія памяшканні пад зерне новага ўраджаю.
Усе сцвярджаюць, што працаваць не цяжка. Згодна з заканадаўствам аб працы, юныя работнікі праз кожную гадзіну маюць 15-хвілінныя перапынкі на адпачынак. На вагавой пастаянна ёсць пітная вада. Калі размова зайшла пра тое, на што патрацяць зарплату, адказалі па-рознаму. Але бачна: усе ганарацца тым, што будуць мець уласна заробленыя грошы. Дзеці з задавальненнем дзяліліся сваімі эмоцыямі:
— Летнія канікулы доўжацца тры месяцы, а работа ў студатрадзе — некалькі тыдняў. Хапае часу на адпачынак пасля змены: можна пакупацца, пагуляць з сябрамі.
— Прыемна, што нашымі справамі пастаянна цікавяцца намеснік дырэктара гаспадаркі Славамір Шапель, інспектар аддзела кадраў Вераніка Лібоза. Прыязджае і дырэктар Юрый Шымчык.
— У кампаніі аднакласнікаў працуецца лёгка і бадзёра. Тут мы бачым работу хлебаробаў і разумеем, што хлеб даецца нялёгка.
Амаль ва ўсіх студатрадаўцаў у ААТ «Навасёлкі-Лучай» працуюць бацькі. Таму юныя памочнікі стараюцца іх не падвесці, шчыруюць на давядзенні да парадку збожжа. Некаторыя задумваюцца аб выбары будучай прафесіі і плануюць звязаць свой лёс з сельскай гаспадаркай.
З ліку студатрадаўцаў мінулых гадоў ёсць такія, хто пасля школы заключыў з гаспадаркай мэтавы дагавор на вучобу ў навучальнай установе аграрнага профілю.
Анна Анішкевіч
