З 1 ліпеня згодна з Законам Рэспублікі Беларусь «Аб змяненні законаў па пытаннях сацыяльнага абслугоўвання і сацыяльных выплат» пенсіі і іншыя сацыяльныя выплаты грамадзяне ў Мінску, гарадах абласнога падпарадкавання і раённых цэнтрах атрымліваюць толькі ў банку.
— У нашым раёне гэтыя змены закранулі амаль 500 грамадзян, — расказвала намеснік начальніка ўпраўлення па працы, занятасці і сацыяльнай абароне райвыканкама Таццяна Багушэвіч. — Права выбару атрымання пенсіі і іншых сацыяльных выплат праз аддзяленні паштовай сувязі або банкі захоўваецца толькі для грамадзян, якія дасягнулі 70 гадоў або пражываюць у сельскай мясцовасці, інвалідаў I і II груп.
Як успрынялі новаўвядзенне пастаўчане? Карэспандэнт «ПК» Анна Анішкевіч пацікавілася гэтым у некаторых з іх.
Раіса Грынько:
Усё новае я ўспрымаю пазітыўна. Як толькі атрымала пісьмо з просьбай аформіць картку ў банку, адправілася туды. Працэдура заняла няшмат часу. Ужо ў чэрвені пенсія была залічана на картку. Падключыла СМС-апавяшчэнне і, як толькі грошы паступаюць на рахунак, атрымліваю паведамленне. Тое самае і пры разліку ў магазіне, аптэцы — ведаю, колькі патраціла. Карыстацца карткай зручна: у дзень выплаты пенсіі не трэба сядзець дома і чакаць прыходу паштальёна.
Іван Паўкштэла:
На працягу пяці гадоў, што знаходжуся на пенсіі, мне яе прыносіла паштальён. Любіў патрымаць купюры ў руках, адкласці на адпаведныя расходы. Жонка з першага месяца выхаду на заслужаны адпачынак пенсію атрымлівае на картку. Мне ж гэта было незразумела, думаў, што няма ніякага кантролю над расходамі. Але выйшаў закон, і яго не абысці. Не цягнуў да апошняга — картку аформіў загадзя. За два месяцы карыстання ўбачыў перавагі такой паслугі. З вясны да восені шмат часу праводжу на дачы. Раней у дзень выплаты пенсіі заўсёды прыходзілася ехаць у горад. Здаралася, атрымліваў яе ў паштовым аддзяленні (трэба было выстаяць у чарзе). Цяпер, калі патрэбны наяўныя грошы, іду ў банк. Жонка настойвае, каб вучыўся карыстацца банкаматам.
Здзіслаў Пятроўскі:
Прызнаюся, адольвалі сумненні, ці змагу карыстацца карткай, што будзе, калі банкамат мне яе не верне. Аднак усё асвоіў хутка, бо няма нічога складанага. Картку выбраў з кэш-бэкам. Гэта значыць, што нейкі працэнт ад пакупак вяртаецца на рахунак. Прыбытак невялікі, але ўсё ж. Зручна, што ў магазін можна ісці без кашалька, што не згубіш рэшту, якую даюць капейкамі.
