Гараджане мелі доўгія выхадныя, а вось аграрыям было не да адпачынку. Надвор’е, якое ў пачатку вясны прытармазіла палявыя работы, нарэшце нармалізавалася, і механізатары шчыравалі так, каб з сяўбой сельскагаспадарчых культур укласціся ў аптымальныя тэрміны.
- Згодна з інфармацыяй райсельгасхарчу, зерневыя і зернебабовыя пасеяны на 4 438 гектарах, рапс — на 1 325. Плошчу звыш плана гэта культура заняла ў ААТ «Ярэва-агра» і СП «Дунілавічы-агра».
- Цяпер — час каралевы палёў. Па раёне пад яе адведзена 6 300 гектараў. З іх 1 250 і 1 100 у ААТ «Навасёлкі-Лучай» і «Камайскі-агра». Па стане на 17 мая кукуруза пасеяна на 78 % плошчы.
- Бульбу сёлета вырошчвае толькі ААТ «Навасёлкі-Лучай». Яна займае 35 гектараў. У гаспадарцы ўпэўненыя, што другога хлеба з такой плошчы павінна хапіць на ўласныя мэты і для рэалізацыі на сельскагаспадарчых кірмашах і ў фірменных магазінах сельгаспрадпрыемства.
- На парадку дня — падкормка шматгадовых траў. Азімыя зерневыя і рапс пэўную дозу ўдабрэнняў атрымліваюць ужо ў другі раз. Актыўна гэта работа вядзецца ў ААТ «Навасёлкі-Лучай», «Кураполле-агра», «Ярэва-агра», «Хацілы-агра». Усе гаспадаркі раёна завяршылі хімпраполку азімых культур і пачалі хімпраполку яравых.
- У гэтыя дні насычанымі жоўтымі кветкамі радуе вока азімы рапс. А вось яравы патрабуе неадкладнай абароны ад шкоднікаў. Таму многія гаспадаркі ўжо распачалі другую інсектыцыдную яго апрацоўку.
- Не за гарамі нарыхтоўка кармоў, ад колькасці і якасці якіх залежаць прадукцыйнасць дойнага статка, прывагі буйной рагатай жывёлы. Каб стварыць іх надзейны запас, трэба не прапусціць аптымальную фазу скошвання траў, трымаць на кантролі вільготнасць зялёнай масы пры закладцы ў сянажныя траншэі.
Анна Анішкевіч
