Адказвае ўчастковы інспектар міліцыі
Як прымусіць плаціць на дзіця?
«Мы з мужам разведзеныя. Удзел у выхаванні сына ён не прымае, не дапамагае і матэрыяльна. Як прымусіць яго рабіць гэта і звярнуць увагу на існаванне дзіцяці?» З такой жыццёвай сітуацыяй, характэрнай для многіх адзінокіх маці, прыйшла да праваахоўнікаў падчас прыёму насельніцтва адна з жыхарак раёна. На зададзенае ёю пытанне адказвае начальнік аддзела аховы правапарадку і прафілактыкі РАУС Павел Нагановіч:
— У адпаведнасці з артыкуламі 91 і 92 Кодэкса Рэспублікі Беларусь аб шлюбе і сям’і, пасля скасавання шлюбу той з бацькоў, з кім застаецца дзіця, мае права звярнуцца ў суд з грамадзянскім іскам для спагнання аліментаў і ўстанаўлення іх велічыні. Сума залежыць ад колькасці непаўналетніх дзяцей. На адно дзіця штомесяц спаганяецца 25% заробку і (або) іншага даходу бацькоў, на двух — 33%, на трох — 50%. Калі аліментшчык нідзе афіцыйна не працаўладкаваны і не мае магчымасці выплачваць назначаныя судом аліменты, разлік ажыццяўляецца з сумы пражытачнага мінімуму. Пры гэтым для працаздольных і беспрацоўных або не занятых з розных прычын у эканоміцы бацькоў мінімальная велічыня аліментаў за месяц будзе складаць не менш за 50% на адно дзіця, 75% — на двух, 100% — на трох і больш дзяцей бюджэту пражытачнага мінімуму ў сярэднім на душу насельніцтва.
За невыкананне абавязкаў па ўтрыманні дзяцей: ухіленне ад платы аліментаў ці ўтойванне сваіх даходаў — пагражае крымінальная адказнасць па артыкуле 174 КК Рэспублікі Беларусь. Яго санкцыя прадугледжвае пакаранне ад грамадскіх работ да пазбаўлення волі. З пачатку 2023 года Пастаўскім раённым аддзелам Следчага камітэта ўзбуджана 15 крымінальных спраў па названым вышэй артыкуле ў адносінах да грамадзян, якія ўхіліліся ад утрымання дзяцей або пакрыцця расходаў, затрачаных дзяржавай на іх утрыманне.
Падрыхтавала Алена Шапавалава
