Віцебскі абкам прафсаюза работнікаў аграпрамысловага комплексу падвёў вынікі спаборніцтва, арганізаванага ў перыяд веснавых палявых работ.
Удзельнікі былі падзелены на групы ў залежнасці ад віду і прадукцыйнасці тэхнікі. Пераможцамі сталі 14 механізатараў вобласці. Яны ўдастоены дыпломаў і заахвочаны прэміямі. Сярод іх і пастаўчане.
На падкормцы пасеваў азімых і пашы ў другой групе ўзнагароджаны Аляксандр Федаронак з ААТ «Навасёлкі-Лучай». На сяўбе тэхнічных культур (лён) у трэцяй групе ў лідары выйшаў Аляксандр Аліноўскі з Пастаўскага льнозавода.
У пачатку рабочага дня ў сераду прафсаюзны лідар аграрыяў раёна Васілій Катовіч у прысутнасці іншых механізатараў уручыў Аляксандру Аліноўскаму дыплом абкама прафсаюза работнікаў АПК. За старанную працу падзякавала механізатару дырэктар прадпрыемства Алёна Юрынёнак. Яна адзначыла, што ўклад у яго перамогу ўнеслі і тыя, хто якасна рыхтаваў глебу да сяўбы.
У гэтыя дні Аляксандр Аліноўскі рве лён. І тут таксама дабіваецца высокіх вынікаў.
Анна Анішкевіч. Фота аўтара
