У мінулую сераду дырэктару ААТ «Навасёлкі-Лучай» Юрыю Шымчыку споўнілася 55 гадоў. Перад ранішняй нарадай яго павіншавалі старшыня райвыканкама Сяргей Чэпік, старшыня райкама прафсаюза работнікаў АПК Васілій Катовіч, спецыялісты гаспадаркі.
Вучыўся ў папярэдніка
Юбіляр — ураджэнец Гродзеншчыны. У далёкім 1990-м прыехаў у Навасёлкі пасля заканчэння сельскагаспадарчага тэхнікума. Пачынаў памочнікам брыгадзіра. Трапіў у каманду вопытных агранома, інжынера, заатэхніка. Пад кіраўніцтвам умелага гаспадарніка Алега Валодзькі рабіў першыя крокі ў будучыню. Прыглядаўся да метадаў работы славутага старшыні, пераймаў у яго самае каштоўнае: прадбачлівасць, ініцыятыўнасць, добразычлівыя адносіны да людзей.
Ішоў час, Юрый Шымчык завочна скончыў Велікалуцкі сельскагаспадарчы інстытут. У 2004 годзе стаў аграномам-хімікам, у 2009-м яго назначылі намеснікам старшыні гаспадаркі, а праз год — старшынёй. Пачынаць было няпроста: замяніўшы на пасадзе вядомага не толькі ў раёне, але і ва ўсёй Беларусі старшыню, трэба было ўтрымліваць высока ўзнятую ім планку.
Давер апраўдаў
Мінула 14 гадоў з таго часу, як Юрый Францішкавіч узначаліў гаспадарку. Ён прадаўжае добрыя традыцыі, закладзеныя яго папярэднікам, прымнажае здабыткі сельгаспрадпрыемства. Вялікую ўвагу надае будаўніцтву: уведзена ў эксплуатацыю рабатызаваная ферма, капітальна адрамантаваны дамы ў Коўзанах, 12 сямей справілі наваселле ў сучасным электрадоме ў Навасёлках. Аграгарадок — адзін з найпрыгажэйшых на Пастаўшчыне. У вяскоўцаў ёсць магчымасць адзначаць памятныя даты ў мясцовым утульным кафэ. На футбольным полі са штучным пакрыццём дзеці актыўна займаюцца спортам. У нашым, а таксама Браслаўскім раёнах адкрыты 9 фірменных магазінаў, у якіх не толькі рэалізуецца прадукцыя ўласнай вытворчасці ААТ «Навасёлкі-Лучай», але і багаты асартымент іншых тавараў.
Пастаянна абнаўляецца машынна-трактарны парк гаспадаркі, укараняюцца перадавыя тэхналогіі вырошчвання зерневых і зернебабовых, утрымання жывёлы. І ўсё ж асновай поспеху дырэктар лічыць чалавечы фактар: без майстэрства чалавека дасягнуць жаданага выніку немагчыма. Таму кіраўнік гаспадаркі памятае і падтрымлівае ветэранаў, з вялікай пашанай адносіцца да сваіх работнікаў, вядзе з імі дыялог у полі, на ферме, дзе часта бывае. А калектыў ААТ «Навасёлкі-Лучай» — гэта сплаў вопыту і маладосці. Людзі маюць тут камфортнае жыллё, годную заработную плату. І за клопат пра іх не толькі шчыра працуюць, але і ўкладваюць душу ў працу.
Тэмпаў не зніжаюць
Па выніках работы за мінулы год калектыў ААТ «Навасёлкі-Лучай» занесены на абласную Дошку гонару. На высокім узроўні развіцця тут знаходзіцца як раслінаводства, так і жывёлагадоўля. Прааналізаваўшы работу гэтай моцнай шматпрофільнай гаспадаркі, разумееш, што ёй кіруе высакакласны спецыяліст, прафесіянал, які добра ведае сельскагаспадарчую вытворчасць, валодае выдатнымі арганізатарскімі здольнасцямі. Ва ўсім тут адчуваецца рука гаспадара.
На сельгаспрадпрыемстве не зніжаюць тэмпаў і сёлета. Вытворчасць малака за першае паўгоддзе склала 7 342 тоны, што складае да ўзроўню мінулага года 103,9%, вытворчасць мяса — 734 тоны. Атрымана прадукцыі на 15 814 тысяч рублёў, у разліку на аднаго работніка — 44,2 тысячы. Чысты прыбытак ад рэалізацыі прадукцыі — 3 239 тысяч рублёў.
За шматгадовую добрасумленную працу ў аграпрамысловым комплексе і асабісты ўклад у развіццё сельгасвытворчасці раёна Юрыю Шымчыку ў 2015 годзе было прысвоена ганаровае званне «Чалавек года Пастаўшчыны». Сярод узнагарод — Ганаровыя граматы Нацыянальнага сходу Рэспублікі Беларусь і Міністэрства сельскай гаспадаркі і харчавання Беларусі, Падзяка Прэм’ер-міністра краіны. Летась Юрый Францішкавіч з рук Прэм’ер-міністра Беларусі Рамана Галоўчанкі атрымаў медаль «За працоўныя заслугі». А людзі цэняць свайго кіраўніка не толькі за дасягненні, але і за любоў да зямлі, абранай справы, чалавечнасць.
Юрый Шымчык прадаўжае добрыя традыцыі, закладзеныя яго папярэднікам, прымнажае здабыткі гаспадаркі.
Пра людзей Юрый Шымчык клапоціцца не толькі як кіраўнік гаспадаркі, але і як дэпутат раённага і абласнога Саветаў дэпутатаў. З вялікай увагай адносіцца да сваіх выбаршчыкаў і іх зваротаў, імкнецца дапамагчы ў вырашэнні любой праблемы. Падчас работы сесій унікае ва ўсе пытанні, якія выносяцца на абмеркаванне.
Юрый Шымчык — сапраўдны гаспадар. Тым не менш пастаянна вучыцца, спасцігае новае, эксперыментуе. Ён добры сем’янін, клапатлівы бацька дзвюх дачок, надзейны сябар.
…У гэтыя дні ў ААТ «Навасёлкі-Лучай» набліжаецца да завяршэння жніво, прадаўжаецца нарыхтоўка кармоў. На парадку дня — сяўба азімых. Карацей, расслабляцца не прыходзіцца. І ва ўсім тэмп задае дырэктар. Плёну вам, Юрый Францішкавіч, і сіл для ажыццяўлення задуманага і дасягнення новых поспехаў!
Анна Анішкевіч
