Ферма ў Волахах ААТ «Хацілы-агра», дзе ўстаноўлена 12 робатаў, па выніках работы за другі квартал бягучага года заняла 1-е месца ў вобласці сярод рабатызаваных ферм, а ферма з даільнай залай гэтай гаспадаркі — 2-е.
Калі старшыня райкама прафсаюза работнікаў АПК Васілій Катовіч прывёз аператарам дыплом пераможцы, з робатамі ўпраўляліся Іна Хацяновіч і Святлана Браздаўскайтэ.
— Мы працуем па двое ў змене, — гаварылі жанчыны. — Усяго 6 аператараў. Гэта Святлана Карпушанка, Валянціна Таяновіч, Марына Міхновіч і Людміла Акуліцкая. Наша ферма існуе з 2009 года. За гэты час мы не толькі не збавілі тэмпаў, але і павышаем іх.
За першае паўгоддзе бягучага года сярэдні надой тут склаў амаль 5 000 кілаграмаў малака. Усё яно рэалізуецца сортам «экстра». Несумненна, уклад у поспех уносяць як аператары, што абслугоўваюць робатаў, так і ветурачы, слесары, даглядчыкі жывёлы. А таксама механізатары, якія забяспечваюць статак якаснымі кармамі. На высокім узроўні на ферме наладжана племянная работа: статак пастаянна абнаўляецца, папаўняецца высокапрадукцыйнымі цялушкамі.
— А яшчэ кожны дыплом — заслуга дырэктара гаспадаркі Вячаслава Іосіфавіча Крыштафовіча, — гаварылі аператары. — Ён душой хварэе за справы сельгаспрадпрыемства. Яго ў любы час сутак можна сустрэць на ферме.
— Мне вельмі прыемна ў чарговы раз уручаць вам дыплом пераможцы, — гаварыў Васілій Катовіч. — Вамі ганарыцца не толькі Пастаўшчына, але і Віцебшчына. Аснова асноў, вядома, прафесіяналізм кадраў, умелае кіраўніцтва дырэктара Вячаслава Крыштафовіча, загадчыкаў ферм Алены Лаўрыновіч і Веніяміна Бучы.
Анна Анішкевіч
