Нарадзіўся 20 сакавіка 1987 года ў вёсцы Муляры Пастаўскага раёна Віцебскай вобласці. У 2011-м скончыў Віцебскі дзяржаўны медыцынскі ўніверсітэт па спецыяльнасці «Лячэбная справа».
За выключэннем двух гадоў, якія працаваў анестэзіёлагам-рэаніматолагам аддзялення анестэзіялогіі і рэанімацыі Мядзельскай ЦРБ, уся працоўная біяграфія Аляксандра Сварцэвіча звязана з Пастаўскай ЦРБ. Тут праходзіў інтэрнатуру, працаваў тэрапеўтам у Камайскай участковай бальніцы, затым — урачом-інфекцыяністам інфекцыйнага аддзялення стацыянара ЦРБ, а з 2016-га па 2019-ы ўзначальваў яго. Апошнія паўтара года займаў пасаду намесніка галоўнага ўрача па медыцынскай частцы.
11 жніўня бягучага года распараджэннем старшыні райвыканкама па ўзгадненні з галоўным упраўленнем па ахове здароўя Віцебскага аблвыканкама і Міністэрствам аховы здароўя Беларусі Аляксандр Сварцэвіч назначаны галоўным урачом Пастаўскай цэнтральнай раённай бальніцы.
— Першачарговая мэта дзяржаўнай палітыкі Беларусі ў галіне аховы здароўя — стварэнне ўмоў, якія дазволяць кожнаму чалавеку рэалізаваць сваё права на ахову здароўя. Яе наш калектыў і будзе ўвасабляць у жыццё, — дзяліўся планамі работы на новай пасадзе Аляксандр Сварцэвіч. — У цэнтры ўвагі — умацаванне матэрыяльна-тэхнічнай базы ўстановы, даступнасць і якасць аказання медыцынскай дапамогі, эфектыўнасць выкарыстання матэрыяльных і кадравых рэсурсаў, лічбавая трансфармацыя, узмацненне прафілактычнай работы з насельніцтвам, у тым ліку папулярызацыя дыспансерызацыі. Задум шмат.
Калі гаварыць прадметна, то сёння закупліваем дэфібрылятары, клінкі для інтубацыі, калькаскоп і іншае медыцынскае абсталяванне, рамантуем дзіцячае аддзяленне стацыянара. Да канца года плануем накіраваць на вучобу каля 20 медработнікаў: некалькі маладых спецыялістаў — на перападрыхтоўку па вузкіх спецыяльнасцях, у якіх ёсць патрэба зараз або можа ўзнікнуць у перспектыве, астатніх — на павышэнне кваліфікацыі.
Задачы перад калектывам Пастаўскай ЦРБ стаяць адказныя. Спадзяюся, што з усімі справімся, тым больш што для гэтага ёсць усе рэсурсы.
