На беразе Дняпра ў Александрыі Шклоўскага раёна ў мінулыя выхадныя прайшло рэспубліканскае свята «Купалле». Яно было насычана разнастайнымі мерапрыемствамі. А кульмінацыяй стала народнае шоу пад назвай «Будзе вельмі цікава!», у якім удзельнічалі зоркі беларускай і расійскай эстрады. Ганарова, што на адной сцэне з імі выступалі нашы зямлячкі Ірына Іршонак і Злата Ярашэвіч.
Пра Злату, якая жыве ў Старым Двары і вучыцца ў Навасёлкаўскай СШ імя А. А. Валодзькі, наша газета расказвала не раз. Таленавітая дзяўчына займаецца вакалам у Нацыянальным цэнтры мастацтваў імя Уладзіміра Мулявіна ў Мінску, з’яўляецца студэнткай акадэміі расійскага кампазітара, спевака і прадзюсара Ігара Крутога. У Александрыі яе прадстаўлялі як пераможцу шматлікіх музычных рэспубліканскіх і міжнародных конкурсаў.
Ірына Іршонак — ураджэнка Варапаева. Музыкай захапляецца з ранняга дзяцінства. Скончыла мясцовую дзіцячую школу мастацтваў, удзельнічала ва ўсіх раённых мерапрыемствах і конкурсах, займала прызавыя месцы. Пасля 9 класаў паступіла ў Наваполацкі музычны каледж на спецыяльнасць «Дырыжыраванне». Была ўдзельніцай хору «Рэчанька» і фальклорнага ансамбля «Вербіца» каледжа, а таксама спявала ў заслужаным аматарскім калектыве Беларусі — вакальна-харэаграфічным ансамблі «Камарыкі» імя Часлава Клечкі Палаца культуры ААТ «Нафтан». Падчас вучобы заваявала мноства ўзнагарод як гарадскога, так і міжнароднага ўзроўняў. З’яўлялася ўладальніцай прэстыжнай прэміі спецыяльнага фонду Прэзідэнта Беларусі па падтрымцы таленавітай моладзі.
Цяпер Ірына — студэнтка 4 курса Беларускага дзяржаўнага ўніверсітэта культуры і мастацтваў. У мінулым годзе стала лаўрэатам рэспубліканскага радыёконкурсу «Маладыя таленты Беларусі». Летась на фестывалі «Вытокі. Крок да Алімпу» на рэгіянальным этапе ў Полацку ёй прысуджана 1-е месца сярод канкурсантаў 17—30 гадоў. На фінальным у Мінску — Гран-пры, а ў падарунак — права выконваць аўтарскую песню кіраўніка арт-гурта «Беларусы» спевака і кампазітара Валерыя Шмата. Сёлета з фестывалем «Вытокі» пабывала ў Жодзіне, Слоніме, Глыбокім. З конкурсу «Как на речке было на Фонтанке» ў Санкт-Пецярбургу ў Беларусь Ірына Іршонак прывезла дыплом лаўрэата I ступені і падарунак — залатыя завушніцы.
— Фестываль у Александрыі — яркі, маштабны, душэўны, — расказвалі дзяўчаты. — Галоўны канцэрт ператварыўся ў сапраўдны музычны рынг. Мы і Сафія Рустамава, якая сёлета будзе абараняць гонар Беларусі ў дзіцячым конкурсе на «Славянскім базары ў Віцебску», выступалі на адной сцэне з народнымі артыстамі Беларусі Уладзімірам Громам, Анатолем Ярмоленкам, заслужанымі артыстамі Ірынай Дарафеевай, Русланам Аляхно, Аляксандрам Саладухам, Вікторыяй Алешкай, Аленай Ланской, арт-гуртом «Беларусы», ансамблем «Сябры», шоу «Алюр», заслужанай артысткай Расіі Зарай і народнай — Надзеяй Кадышавай.
На канцэрт у Александрыі прадалі 3 000 білетаў. Сярод гледачоў быў і Прэзідэнт Беларусі Аляксандр Лукашэнка. І гэта дадавала хвалявання. Цэнім час, праведзены на «Купаллі» побач са славутымі артыстамі. Удзячныя арганізатарам!
Новых творчых поспехаў вам, таленавітыя зямлячкі!
Анна Анішкевіч
