У той дзень шляхі двух пастаўскіх юнакоў і 70-гадовага пенсіянера перасекліся ў магазіне «Копеечка», размешчаным у мікрараёне вуліцы Юбілейнай у райцэнтры. Хлопцы былі нецвярозыя, але, напэўна, яшчэ жадалі дабаўкі, бо засяродзілі ўвагу на вітрыне з півам. Пенсіянер заглянуў у гандлёвую кропку, каб набыць прадукты харчавання. Але маладыя людзі бесцырымонна загароджвалі сабой праход у гандлёвую залу…
Пажылы чалавек папрасіў юнакоў саступіць яму дарогу. Адзін з іх адразу ж збочыў, а другі — Д., — нават не крануўшыся з месца, кінуў старому: «Можаш абысці!» Гэта пакрыўдзіла мужчыну, і ён зрабіў хлопцу заўвагу, маўляў, нельга так сябе паводзіць. Д. адрэагаваў агрэсіўна і пачаў правакаваць канфлікт. Пенсіянер прыгразіў, што выкліча міліцыю.
На гэтым канфлікт не завяршыўся. Д. першым выйшаў з магазіна, дачакаўся пенсіянера і прадоўжыў высвятляць з ім адносіны. Абодва размаўлялі на павышаных тонах, размахвалі рукамі. Жанчына, якая праходзіла міма і чула перапалку, параіла хлопцу папрасіць прабачэння ў пажылога чалавека. Але той не прыслухаўся, а, наадварот, распаліўся яшчэ больш і ўдарыў мужчыну кулаком у твар. Пасля рукапрыкладства пацярпелы пазваніў у міліцыю.
У адносінах да Д. была ўзбуджана крымінальная справа па факце здзяйснення злачынства, прадугледжанага ч.1 арт. 339 Крымінальнага кодэкса Рэспублікі Беларусь. Суд прызнаў яго вінаватым у здзяйсненні наўмысных дзеянняў, якія груба парушалі грамадскі парадак, дэманстравалі яўную непавагу да грамадства і суправаджаліся прымяненнем насілля, і назначыў пакаранне ў выглядзе штрафу ў памеры 50 базавых велічынь (1 850 рублёў).
Хочацца верыць, што гэта стане для Д. урокам на ўсё жыццё і ў будучым ён ніколі не дазволіць сабе непаважліва адносіцца да іншых, асабліва да пажылых, не будзе парушаць грамадскі парадак. Ды і многія іншыя маладыя людзі павінны задумацца над сваімі паводзінамі, якія часам бываюць непрадказальнымі.
Наталля Максімовіч, суддзя суда Пастаўскага раёна
