Годныя «Праўнукі Перамогі»
У канцы красавіка завяршыўся абласны этап рэспубліканскага квэста «Па слядах Перамогі». 3-е месца ў ім заваявалі навучэнцы 4 класа Варапаеўскай СШ.
Спачатку каманда «Праўнукі Перамогі» ў складзе Уладзіслава Шарыпы, Маргарыты Франузы, Эліны Пашковай, Арыны Шафаровіч, Насці Ермаловіч, Каці Дзюшко і Аляксандры Гірсёнак пад кіраўніцтвам педагога-арганізатара Юліі Гваздзеўскай перамагла на раённым этапе. Затым на працягу 10 дзён змагалася на абласным. На ім трэба было ў фармаце анлайн прадставіць каманду, адказаць на пытанні розных віктарын, рашыць рэбусы, выканаць песні ваенных гадоў, даслаць знятыя відэаролікі і фотаздымкі на конкурс «Армейская фотабудка». Старанні аказаліся недарэмнымі: наперад сябе варапаеўскія школьнікі прапусцілі толькі гімназістаў з Оршы і суседзяў з Докшыц.
— У абласным этапе квэста ўдзельнічала амаль 130 навучэнцаў з 18 рэгіёнаў Віцебшчыны — акцябраты і піянеры дзвюх узроставых катэгорый: 7—10 і 10—14 гадоў, — расказвала намеснік дырэктара Варапаеўскай СШ Яніна Раманава. — Гэта члены Беларускай рэспубліканскай піянерскай арганізацыі, па ініцыятыве якой праводзілася гульня. Лічу, што 3-е месца — годны вынік. Малайцы, навучэнцы! Рэспект Юліі Віктараўне за падрыхтоўку! За песню камандзе прысуджана 2-е месца. Фотаздымак — у ліку найлепшых.
29 красавіка пераможцы былі запрошаны ў абласны Палац піянераў і моладзі на ўшанаванне. Ганаровым госцем мерапрыемства стаў старшыня аблвыканкама Аляксандр Субоцін. Узнагароду «Праўнукам Перамогі» ўручыла старшыня абласной арганізацыі грамадскага аб’яднання «БРПА» Ірына Яленская.
Анна Анішкевіч
