Сузор’е майстроў Пастаўшчыны. Так называецца выстава вырабаў нашых народных умельцаў, якая адкрылася ў канцы сакавіка ў Глыбоцкім Доме рамёстваў.
Гэта абменная выстава. У лютым глыбачане прывозілі ў Паставы свае работы, пастараўшыся прадставіць усё, чым яны займаюцца пад дахам установы культуры. Пры гэтым яшчэ раней дамовіліся з кіраўніцтвам «Старога млына», што праз месяц будуць чакаць іх вырабы ў сябе.
— У Глыбокае мы павезлі выцінанку, саломапляценне і аплікацыю саломкай, маляванку, ляльку, кераміку, ткацтва, бісерапляценне, вышыўку, народны касцюм, — расказвала загадчыца філіяла №1 «Дом рамёстваў «Стары млын» Цэнтра культуры і народнай творчасці раёна Таццяна Петух. — Узялі толькі новыя работы, створаныя нашымі майстрамі на працягу двух апошніх гадоў. Яны ўдзельнічалі ў розных абласных і рэспубліканскіх выставах і конкурсах, а цяпер захоўваюцца ў фондзе.
Разам з вырабамі ў суседні райцэнтр адправіліся сама Таццяна Мікалаеўна, кіраўнік народнага клуба народных майстроў і самадзейных мастакоў «Майстры» Алена Крывенькая і метадыст Крысціна Брэская. На адкрыцці выставы яны расказалі прысутным пра пастаўскі Дом рамёстваў, яго даўняе цеснае сяброўства з глыбоцкім, новыя перспектывы сумеснай работы, пазнаёмілі з экспазіцыяй, якая будзе працаваць у суседзяў да сярэдзіны мая.
Восенню вырабы пастаўскіх майстроў змогуць убачыць жыхары Віцебска, дзе таксама запланавана правядзенне выставы.
Алена Шапавалава
Фота Глубокскай цэнтралізаваннай клубнай сістэмы
