Знайсці прызванне ў сельскай гаспадарцы заклікалі выпускнікоў школ Пастаўшчыны прадстаўнікі сельскагаспадарчых ВНУ Беларусі.
Інфармацыю пра факультэты і спецыяльнасці навучальных устаноў можна атрымаць з розных крыніц. Але калі пра ўмовы паступлення, вучобы і пражывання, правядзенне вольнага часу, самарэалізацыю, дадатковыя бонусы расказваюць прадстаўнікі ВНУ, то ўспрымаецца ўсё гэта значна лягчэй. З мэтай аказання падтрымкі навучэнцам у выбары сферы будучай прафесійнай дзейнасці на базе Пастаўскага дзяржаўнага каледжа прайшла прафарыентацыйная сустрэча.
На яе прыехалі дэкан аграрнага факультэта Беларускага дзяржаўнага аграрнага тэхнічнага ўніверсітэта дацэнт, кандыдат тэхнічных навук Віктар Лоўкіс, дацэнт кафедры генетыкі і развядзення сельскагаспадарчай жывёлы Віцебскай дзяржаўнай акадэміі ветэрынарнай медыцыны Сяргей Базылеў, старшы выкладчык кафедры агульнапрафесійных і спецыяльных юрыдычных дысцыплін Беларускай дзяржаўнай сельскагаспадарчай акадэміі Вячаслаў Мацюк і выкладчык адасобленага структурнага падраздзялення «Аграрны каледж Віцебскай акадэміі ветмедыцыны» Вікторыя Лук’янава.
Госці засяродзілі ўвагу на тым, што падыходы да развіцця сельгасвытворчасці ўвесь час мяняюцца, таму галіне неабходныя падрыхтаваныя спецыялісты з сучаснымі ведамі. Сістэма вышэйшай аграрнай адукацыі ў Беларусі дынамічна развіваецца. Прадстаўнікі названых навучальных устаноў падрабязна расказалі пра іх.
Інспектар аддзела арганізацыйна-кадравай работы райвыканкама Людміла Шубелька нагадала выпускнікам пра магчымасць заключэння мэтавага дагавора для паступлення ў аграрныя ВНУ і гарантыі, якія ён дае пры паступленні і падчас вучобы. Са спецыяльнасцямі, на якія сёлета будзе ажыццяўляцца прыём у Пастаўскі дзяржаўны каледж, пазнаёміла часова выконваючая абавязкі дырэктара Наталля Лятоха.
У якасці патэнцыйнага наймальніка на сустрэчы прысутнічаў першы намеснік дырэктара Пастаўскага малочнага завода Георгій Касцень. Усе ахвотныя маглі падысці да любога са спікераў і задаць пытанне.
Навучэнцы каледжа, якія наведваюць аб’яднанне па інтарэсах «Гармонія», паказалі прысутным гумарыстычную сцэнку пра вясковае жыццё. Затым гаспадары правялі майстар-класы па выпечцы ажурных бліноў, арыгінальным і прыгожым складанні сурвэтак, сервіроўцы банкетнага стала, лепцы з каляровай мастыкі, а таксама па рабоце матора-тэстара для дыягностыкі сістэмы запальвання легкавога аўтамабіля. Удзельнікі прафарыентацыйнай сустрэчы наведалі выставы тэхнічнай творчасці навучэнцаў каледжа, кулінарных і хлебабулачных вырабаў.
Ужо ў сярэдзіне мая ў выпускнікоў 11 класаў пачнуцца цэнтралізаваныя экзамены, 1 чэрвеня — у 9-класнікаў. Уступныя экзамены для мэтавікоў пройдуць з 6 па 13 чэрвеня (у залежнасці ад выбранай ВНУ), цэнтралізаванае тэсціраванне — з 14 чэрвеня па 6 ліпеня. Таму самы час канчаткова вызначыцца з выбарам.
Анна Анішкевіч
