Прыгожыя і смачныя
Вялікдзень без кулічоў і караваяў уявіць немагчыма. Многія гаспадыні выпякаюць іх самі. Але большасць набываюць у гандлёвых кропках. Перадвелікодныя дні вельмі гарачыя для кандытараў хлебакамбіната Пастаўскага філіяла Віцебскага абласнога спажывецкага таварыства.
Накіроўваюся ў кандытарскі цэх, каб адчуць водар свята. А ён разносіцца нават па тэрыторыі камбіната. Частка свежай выпечкі ўжо зафасавана і чакае адгрузкі. Кіпіць работа ў цэху. Адны кандытары цеста ўзважваюць і фармуюць з яго караваі, другія — дастаюць кулічы з печы і паліваюць глазурай. Апроч сваёй дэкаратыўнай функцыі, традыцыйныя «шапачкі» з яе патрэбны, каб павялічыць тэрмін захоўвання куліча: яна не дае здобе чарсцвець. Другія майстры салодкай справы ўпрыгожваюць кулічы рознакаляровай пасыпкай.
Попыт на выпечку перад Вялікаднем вялікі: толькі на гэтым тыдні кулічоў выпеклі больш за 4 тысячы. Яны рэалізуюцца праз магазіны і аўтамагазіны таварыства, а таксама падчас выязнога вулічнага гандлю. Гатовая прадукцыя пастаўляецца ў рознічную сетку не толькі нашага раёна, але і Браслаўскага, Шаркаўшчынскага.
А які святочны стол без тартоў?! Іх у продажы таксама будзе ў дастатковай колькасці.
Анна Анішкевіч
