Крэатыўнасць і палёт фантазіі
На спартыўна-турыстычным комплексе «Азёркі» ў гэтыя дні мноства наведвальнікаў. Яны наталяюцца прыродай, дыхаюць свежым паветрам, актыўна ўдзельнічаюць у гульнях і забавах Зюзі Паазерскага, Дзеда Бая і іншых міфічных персанажаў. Не прамінаюць госці пафатаграфавацца каля крэатыўных елак. Яны зробленыя ў рамках традыцыйнага творчага конкурсу «Навагодні цуд», аб’яўленага напярэдадні раённым аб’яднаннем прафсаюзаў.
Ідзеш па алеі дызайнерскіх елак — і адразу не разумееш, з чаго яны зробленыя. Кожнае прадпрыемства ці арганізацыя райцэнтра прапанавалі свой варыянт навагодняга дрэва з падручных матэрыялаў і ўпрыгажэнняў, якія адлюстроўваць род іх дзейнасці.
Кожная елка ўнікальная. Ільнозаводская прыгажуня прыбралася ў ільняную сукенку ў беларускім стылі, аздобленую банцікамі, шарыкамі, сняжынкамі. Побач, як і належыць, мяшок з падарункамі, на лавачцы — забаўны снегавік.
Елка з алоўкаў — справа рук прафсаюзнай арганізацыі аддзела па адукацыі райвыканкама. А шыкоўная «дама» ў сукенцы з яловых лапак, і такім жа капелюшы ўвасабляе крэатыўных модніц, якія наведваюць аддзяленне дзённага знаходжання для грамадзян пажылога ўзросту тэрытарыяльнага цэнтра сацыяльнага абслугоўвання насельніцтва.
Зіма без снегавіка — што Новы год без мандарынаў і салаты «Аліўе». Вясёлы сноўмен з мятлой размясціўся побач з арыгінальнай елкай ААТ «Паставымэбля». А УП ЖКГ падрыхтаваў пляцоўку для галоўных герояў казкі Самуіла Маршака «12 месяцаў»: елка з дошчачак, упрыгожаная самаробнымі цацкамі, пад ёй — кошык з кветкамі, пянькі-крэслы для адпачынку.
Журы ў складзе намесніка старшыні райвыканкама Станіслава Чымбурга, начальніка аддзела ідэалагічнай работы, культуры і па справах моладзі райвыканкама Галіны Чаплінскай, яе намесніка Ірыны Лойкі, старшыні раённага аб’яднання прафсаюзаў Іны Далецкай, дырэктара дзіцячай школы мастацтваў імя А. Ромера Жанны Курдо доўга раілася, бо вельмі многія ўдзельнікі праявілі крэатыўнасць і фантазію. Вызначыць пераможцаў было складана. 1-е месца раздзялілі паміж сабой ільнозавод і ААТ «Паставымэбля», 2-е — аддзел па адукацыі райвыканкама і УП ЖКГ. Заахвочвальнымі прызамі адзначаны і ўсе астатнія ўдзельнікі конкурсу.
Анна Анішкевіч
