З Баем і Зюзем карагодзіць будзем!
Учора на СТК «Азёркі» расчыніліся дзверы ў казку: тут упершыню за апошнія 10 гадоў адбылося тэатралізавана-забаўляльнае прадстаўленне з удзелам яркіх міфічных персанажаў. На працягу больш чым двух тыдняў яны будуць дарыць самыя што ні на ёсць рэальныя эмоцыі — радасць, здзіўленне, захапленне і веру ў цуды, якіх мы ўсе чакаем пад Новы год.
Першымі ўдзельнікамі навагодняй праграмы стала група турыстаў з Міншчыны. У іншыя дні ў Азёркі збіраюцца прыехаць госці з Полацка, Наваполацка, Віцебска, Гомеля, Докшыцкага, Астравецкага і іншых раёнаў Беларусі, а таксама вучні пастаўскіх школ. Усе яны пакінулі папярэднія заяўкі на ўдзел у прадстаўленні, у якім будзе месца гульням, карагодам, падарункам.
Галоўныя дэкарацыі для зімовай казкі сёлета стварыла прырода. Велічны заснежаны лес уражвае сваёй бялюткай прыгажосцю і дорыць адчуванне чагосьці светлага і чароўнага. Пранікнуцца такім цудоўным пераднавагоднім настроем можаце і вы: прадстаўленні для індывідуальных наведвальнікаў адбудуцца 25 снежня, 7 і 14 студзеня. Пачатак у 16 гадзін. Кошт білета для дарослага — 7,5 руб., для дзіцяці — 4,5 руб. Для дзяцей да трох гадоў уваход бясплатны.
Іна Сняжкова
