Прыклад для калег і сыноў
Усё жыццё механізатара ААТ «Кураполле-агра» Юрыя Усовіча звязана з сельскай гаспадаркай. Чалавек ён працавіты і адказны. І за гэта яго цэніць кіраўніцтва сельгаспрадпрыемства. У мінулым годзе Юрыю даверылі новы камбайн. Сёлета ўключыцца ў жніво разам з іншымі камбайнерамі гаспадаркі не атрымалася: быў задзейнічаны на касьбе траў другога ўкосу. Тым не менш змог намалаціць 1130 тон збожжа.
— Дзякуй, Юрый Казіміравіч, за тваё старанне, а таксама за годных сыноў, якіх выхаваў, — гаварыў, віншуючы з тысячным намалотам, кіраўнік ААТ «Кураполле-агра» Васілій Касцень. — Ты і для іх, і для калег — добры прыклад.
Сыны Усовіча, Максім і Мікалай, таксама працуюць у Кураполлі: першы — на трактары, другі слясарыць.
Юрый, закончыўшы ўборку збожжавых, перасядзе на трактар з культыватарам, затым падчэпіць сеялку і будзе працаваць на ўраджай наступнага года.
Анна Анішкевіч. Фота аўтара
