Паспрабаваў – атрымалася
Нягледзячы на малапрыкметны ў параўнанні з суседняй рэкламай паказальнік «Рамонт абутку», адрас гэтай невялікай майстэрні ў цэнтры Пастаў ведаюць многія.
Мне яго падказалі калегі, калі спатрэбілася адрамантаваць басаножкі. «Звяртайцеся да Падальца, — параілі. — Ён зробіць хутка і якасна».
— Спецыяльнасцей у мяне некалькі: пячнік, будаўнік, вадзіцель. І дзе я толькі ні працаваў, у тым ліку на Поўначы! — расказваў Сяргей Валянцінавіч. — А колькі дарог скалясіў на фуры! Але ўсё надакучыла. І некалькі гадоў назад нарэшце «прызямліўся» на адным месцы.
Гэта месца — арэндаваная кватэра ў доме, які знаходзіцца побач з магазінам «Мита». Тут, а калі зусім дакладна, у прылеглым да дома гаражы, Сяргей Падалец і абуладкаваў маленькую майстэрню па рамонце абутку. Спачатку адвёў пад яе адзін пакойчык, цяпер займае два.
Цікаўлюся ў майстра, як авалодаў рамяством.
— Пачыналася ўсё банальна, — адказвае. — На жончыных туфлях збіліся набойкі. Папрасіла аднесці ў рамонт. А ў майстэрні мне заявілі, што новыя паставяць толькі праз два тыдні. Ну як чакаць столькі часу? Купіў я тыя набойкі і прыбіў дома сам. Праз некаторы час спатрэбілася адрамантаваць іншую пару абутку. Атрымалася! Так і з’явілася цікавасць. А навучыцца можна ўсяму, калі захочаш.
Аднак, адкрыўшы ў Варапаеве сваю майстэрню па рамонце абутку, не ўсё пайшло гладка. Не з-за якасці выкананай работы (яна задавальняла ўсіх). Справа была ў колькасці заказчыкаў: іх было зусім мала. А які сэнс праседжваць дні без работы?
Не атрымалася ў Варапаеве — вырашыў паспрабаваць у Паставах. І не памыліўся. «Тут людзі ідуць і ідуць. Толькі паспявай рамантаваць! — расказваў. — Летам крыху менш работы, а ў астатні час года — наплыў заказчыкаў. З часам не лічуся, магу хоць да апоўначы сядзець за работай. Стаміўшыся, выйду крыху адпачыць, папіць чаю — і працягваю. На сябе ж працую! Нават калі выйду на пенсію, ніхто не адбярэ ад мяне маё рамяство».
У майстэрні я не затрымалася і паўгадзіны, а яе парог за гэты кароткі прамежак часу пераступілі 4 заказчыкі. Ва ўсіх я цікавілася, чаму прыйшлі менавіта сюды. Трое з іх адказалі, што звяртаюцца не ўпершыню і задаволеныя якасцю выкананай работы і цэнамі. Чацвёрты заглянуў першы раз. Не сумняваюся, што і ён стане тут пастаянным кліентам.
Фаіна Касаткіна
