З вялікай нагрузкай
Збажына ў ААТ «Янавіца-агра» сёлета доўга не спела, таму і жніво тут пачалі аднымі з апошніх. Усяго ўбраць трэба было 1 420 гектараў.
— А камбайнаў у нас — аж два з паловай, — нібы жартам, але з сумам у голасе гаварылі Аляксандр Тамілін і Віталій Паўкштэла, якія на мінулым тыдні працавалі ў полі каля Хадыкінага лесу. — Яўгеній Плотнікаў сёння на рамонце. Заўтра, можа, у каторага з нас камбайн зламаецца. Так паўнацэнна, утрох, рэдка які дзень убіраем. Нагрузка на камбайн высокая. Некалькі дзён на ўборцы рапсу дапамагаў Васілій Чабуранаў з малочнага завода.
Аляксанду Таміліну старання не пазычаць, за плячыма — 30 уборачных. Былі ў яго і тысячныя намалоты. Сёлета пакуль што мае крыху больш за 600 тон. На вопытнага калегу раўняецца Віталій Паўкштэла.
Збожжа ў той дзень вазілі на сушылку ў Лынтупы, якой амаль 20 гадоў. Аператары Анатолій Балсан і Віктар Руткоўскі, электрык Уладзімір Станкевіч да пачатку жніва дасканала яе адрамантавалі. Цяпер высушваюць за суткі па 60 тон збожжа.
Анна Анішкевіч. Фота аўтара
