Увага – на бяспеку працы
Жніво ў разгары, а прафсаюзныя лідары раённага аб’яднання прафсаюзаў штодзённа выязджаюць на палі гаспадарак, каб праманіторыць выкананне патрабаванняў па ахове працы.
У аўторак старшыня раённага аб’яднання прафсаюзаў Іна Далецкая, прафсаюзны інспектар па ахове працы Міхаіл Ахмадзееў і старшыня райкама прафсаюза работнікаў АПК Васілій Катовіч пабывалі ў ААТ «Камайскі-агра» і «Хацілы-агра».
На тэрыторыі зернесушыльнага комплексу ў Камаях — горы залацістай пшаніцы. Амкадор загружае збожжа ў кузаў аўтамабіля, які дастаўляе яго да сушылкі. Яна працуе кругласутачна. На дзяжурстве ў той дзень быў аператар Юрый Вербіловіч. Васілій Катовіч пацікавіўся аб’ёмамі перапрацоўкі, Міхаіл Ахмадзееў аглядзеў пажарны шчыт. На дадзены момант інжынер па тэхніцы бяспекі Арцём Жыдкоў звальняецца з гаспадаркі, таму перадае свае паўнамоцтвы Алене Працуковіч. Яна ўнікае ў сутнасць спраў, задае шмат пытанняў прафсаюзнаму інспектару. Адчуваецца, што жанчына адказная і зацікаўленая ў тым, каб выконваліся ўсе патрабаванні па тэхніцы бяспекі.
ААТ «Камайскі-агра» — вялікая гаспадарка. На жніве ў ёй задзейнічана 10 камбайнаў. Чатыры з іх у аўторак працавалі ў дварчанскім аддзяленні. Важкі колас пшаніцы сведчыць пра добры ўраджай. Камбайнер Ігар Кузьміч падаў сігнал, што бункер поўны. Пакуль збожжа ссыпалася ў кузаў аўтамашыны, прадстаўнікі прафсаюза праверылі тэрмін прыгоднасці вогнетушыцеля, аптэчку, распыталіся ў механізатара пра харчаванне. А ён усім задаволены: абеды смачныя, пітной вадой забяспечаныя. Ды і надвор’е апошнім часам было неспякотнае. А галоўнае — радуе ўраджай. У адзін з дзён Ігар намалаціў 116 тон. Амаль па сотні было і ў многіх яго калег.
На дапрацоўцы збожжа ў ААТ «Хацілы-агра» дапамагаюць студатрадаўцы. У той дзень змена — а гэта 5 чалавек — працавала на падлогавых сушылках. Хлопцы і дзяўчаты ў ахоўных акулярах і масках пералапачвалі зерне. Іна Далецкая пацікавілася правядзеннем для іх інструктажу па тэхніцы бяспекі, распарадкам рабочага дня, якасцю харчавання. Маладыя людзі актыўна адказвалі на пытанні, прызналіся, што працаваць нялёгка. Але кожны з іх прыйшоў сюды, каб падзарабіць.
На полі каля Русакоў хацілаўскія камбайнеры ўбіралі пшаніцу. На краі поля механізатары на трактарах чакалі сігналу ехаць на загрузку. Паміж імі адчуваецца дух спаборніцтва: каму ж першаму пакарыцца тысяча тон намалочанага або перавезенага збожжа. Хлебаробы сцвярджалі, што кіраўніцтва гаспадаркі клапоціцца пра работнікаў і забяспечвае ўсім неабходным. Справа — толькі за надвор’ем. Калі яно паспрыяе, вырашчаны багаты ўраджай будзе своечасова ўбраны і захаваны без страт.
— Выкананне заканадаўства аб ахове працы ў прафсаюзаў — на пастаянным кантролі, — гаварыла Іна Далецкая. — Яшчэ да пачатку жніва праманіторылі ўсе сельгаспрадпрыемствы, выдалі рэкамендацыі і ўказалі тэрміны па ўхіленні выяўленых недахопаў. Наша задача — правяраць умовы, у якіх працуюць хлебаробы. На жаль, як паказвае практыка, менавіта ў аграпрамысловым комплексе найчасцей здараюцца няшчасныя выпадкі на вытворчасці. Прычыны іх розныя: адсутнасць бяспечных умоў працы, ігнараванне правілаў тэхнікі бяспекі. Таму вядзём растлумачальную работу і стараемся дапамагчы вырашыць праблемныя пытанні.
Анна Анішкевіч
