Быць партнёрамі ў вырашэнні праблем
У аўторак наш раён наведаў упаўнаважаны па справах рэлігій і нацыянальнасцей Аляксандр Румак. Ён правёў прамую тэлефонную лінію, прыём грамадзян і сустрэчу з кіраўніцтвам раёна і духавенствам розных канфесій.
На Пастаўшчыне дзейнічаюць 22 рэлігійныя абшчыны: 7 праваслаўных, 10 каталіцкіх, 1 стараабрадчая, 2 евангельскія хрысціян-баптыстаў і 2 хрысціян веры евангельскай. У іх служаць 16 святароў: 9 каталіцкіх, 3 праваслаўныя і па 2 іншай хрысціянскай веры. Большасць з іх удзельнічалі ў дыялогу з упаўнаважаным па справах рэлігій і нацыянальнасцей.
На пачатку сустрэчы намеснік старшыні райвыканкама Станіслаў Чымбург павіншаваў з 25-годдзем святарскіх пасвячэнняў настаяцеля храма Уваскрэсення Хрыстова ў Варапаеве протаіерэя Георгія Лакотку і пробашча камайскага касцёла ксяндза-каноніка Яцэка Хутмана. Было адзначана, што святары ўсіх канфесій Пастаўшчыны прымаюць актыўны ўдзел у выхаванні падрастаючага пакалення і раённых мерапрыемствах, аказваюць дабрачынную дапамогу, падтрымліваюць традыцыйныя сямейныя каштоўнасці. Пры храмах працуюць нядзельныя школы. У Паставах рэгулярна арганізуюцца злёты праваслаўнай моладзі Полацкай епархіі. Католікі ладзяць сямейныя балі. Традыцыйна ў раённым Доме культуры праходзяць ранішнікі, прымеркаваныя да Каляд і Вялікадня абедзвюх вядучых канфесій. У рамках Міжнароднага фестывалю народнай музыкі «Звіняць цымбалы і гармонік» у касцёле святога Антонія Падуанскага адбываецца канцэрт класічнай музыкі з удзелам прафесійных калектываў Беларусі.
Святары запрашаюцца ў райвыканкам на пасяджэнні «круглага стала» па прафілактыцы суіцыдаў, саветы прафілактыкі правапарушэнняў. Прадстаўнікі праваслаўнай і каталіцкай канфесій — частыя госці ў пастаўскім і лынтупскім аддзяленнях кругласутачнага знаходжання грамадзян пажылога ўзросту і інвалідаў ТЦСАН, Дунілавіцкім псіханеўралагічным доме-інтэрнаце для састарэлых і інвалідаў. На базе пастаўскага аддзялення дзённага знаходжання інвалідаў тэрытарыяльнага цэнтра працуе валанцёрскі клуб «Пагаворым пра рэлігію», якім кіруе выкладчык нядзельнай школы пры храме Свяціцеля Мікалая Цудатворцы г. Паставы. Пры СШ №3 створаны рэсурсны цэнтр па духоўна-маральным выхаванні. Там сабраны багаты матэрыял на тэму «Святыя зямлі беларускай». У 6 установах адукацыі раёна для вучняў 5—6 класаў праводзяцца факультатыўныя заняткі «Асновы духоўна-маральнай культуры і патрыятызму».
У раёне зарэгістравана 27 культавых аб’ектаў, якія належаць рэлігійным арганізацыям. Два з іх знаходзяцца ў стадыі будаўніцтва. Гэта храм іконы Божай Маці «Жываносная крыніца» ў вёсцы Станчыкі Лынтупскага сельсавета і касцёл Езуса Міласэрнага ў мікрараёне 5 гарадка ў Паставах. Унікальным помнікам архітэктуры з’яўляецца 400-гадовы касцёл святога Яна Хрысціцеля ў аграгарадку Камаі, які прэтэндуе на ўключэнне ў спіс Сусветнай спадчыны ЮНЕСКА.
Падчас канструктыўнага дыялогу размова ішла пра агульначалавечыя каштоўнасці, імкненне захаваць міжканфесійныя мір і згоду, якія з’яўляюцца важнейшай умовай сацыяльнай стабільнасці ў грамадстве. Акцэнт быў зроблены на ўзаемадзеянні дзяржавы і канфесій. Аляксандр Румак заклікаў святароў і прадстаўнікоў райвыканкама быць партнёрамі ў вырашэнні сацыяльных праблем, а таксама звярнуў увагу на неабходнасць актывізацыі ўзаемадзеяння канфесій з сацыяльнай службай.
Аляксандр Аляксеевіч на працягу 9 гадоў быў намеснікам міністра працы і сацыяльнай абароны Рэспублікі Беларусь. Ён добра ведае праблемы адзінокіх састарэлых, інвалідаў, таму зазначыў, што для такіх людзей менавіта рэлігія часта становіцца адзіным выратаваннем. Былі вызначаны асноўныя напрамкі сумеснай дзейнасці мясцовай улады і духавенства па пытаннях маральнага аздараўлення грамадства. Прадстаўнікі розных канфесій скарысталіся магчымасцю задаць упаўнаважанаму па справах рэлігій і нацыянальнасцей пытанні, якія іх цікавілі.
Працуючы на ранейшай пасадзе, Аляксандр Румак бываў у Пастаўскім тэрытарыяльным цэнтры сацыяльнага абслугоўвання насельніцтва. І цяпер не абмінуў гэту ўстанову, пагутарыў з наведвальнікамі аддзялення дзённага знаходжання грамадзян пажылога ўзросту. А тыя ў сваю чаргу парадавалі высокага госця сваімі крэатыўнымі вырабамі і канцэртнымі нумарамі.
Зайшоў упаўнаважаны па справах рэлігій і нацыянальнасцей і ў мясцовыя храмы. У касцёле Святога Антонія Падуанскага ён сустрэўся з ксяндзом-пробашчам Вадзімам Прасяным, у пастаўскай царкве — з яе настаяцелем протаіерэем Валерыем Пашкевічам. Каля іконы Свяціцеля Мікалая Цудатворцы Аляксандр Румак запаліў свечку і расказаў, што нарадзіўся і выхоўваўся ў праваслаўнай сям’і ў вёсцы Моталь Іванаўскага раёна Брэсцкай вобласці.
У адзіным дні інфармавання ўдзельнічалі таксама галоўны спецыяліст аддзела ідэалагічнай работы, па справах моладзі, рэлігій і нацыянальнасцей Віцебскага аблвыканкама Вячаслаў Хрол, начальнік аддзела ідэалагічнай работы, культуры і па справах моладзі райвыканкама Галіна Чаплінская.
Тэкст і фота Анны Анішкевіч
