У гонар каго названы вуліцы?
У нашым райцэнтры 105 вуліц, плошчаў, завулкаў. Некаторыя з іх названыя ў гонар вядомых людзей. Мы прывычна прамаўляем назвы: Харужай, Сідарэнкі, Кляра, Станкевіча, Скарыны і г.д. А ці ведаем, кім былі гэтыя людзі? Далёка не ўсе нават са старэйшага пакалення. А што ўжо гаварыць пра дзяцей і падлеткаў!
Тым не менш ведаць трэба. Гэтаму пасадзейнічае, у тым ліку, і квэст-марафон «Вядомыя імёны ў назвах вуліц г. Паставы», які праводзіцца сярод моладзі. Яго ідэю падказала творчы, актыўны, зацікаўлены гісторыяй чалавек — Наталія Федаровіч. У райкаме БРСМ ахвотна падтрымалі прапанову. Адклікнуліся гарадскія школы, гімназія, дзяржаўны каледж. І пачаўся збор матэрыялаў.
К заканчэнню навучальнага года завяршыўся першы этап марафону. У мінулую пятніцу ў малой зале райвыканкама навучэнцы СШ №1, СШ №4 і гімназіі прэзентавалі свае работы. Варта адзначыць, што яны не толькі сабралі матэрыял пра вядомых асоб, у гонар якіх названы вуліцы, але і пабывалі на гэтых вуліцах, пацікавіліся, ці ёсць на іх памятныя знакі. Але найперш правялі апытанне сярод навучэнцаў.
На прэзентацыі работ прысутнічалі прадстаўнікі старэйшага пакалення. Яны гаварылі пра каштоўнасць захавання гістарычнай памяці і пераемнасць пакаленняў, ухвалілі акцыю, ацанілі работы навучэнцаў. А першы сакратар райкама БРСМ Кацярына Малевіч паведаміла, што другая, заключная, частка квэста-марафону будзе праведзена 17 верасня — у Дзень народнага адзінства — і абяцае быць вельмі цікавай.
Фаіна Касаткіна
