Тэлефоны ў Гуце «загаварылі»
У нумары за 12 лютага «ПК» змясціў матэрыял «Паступіў сігнал на адсутнасць сігналу». Падставай для яго напісання стаў пісьмовы зварот у рэдакцыю райгазеты жыхаркі вёскі Гута Галіны Болт. У лісце яна паведамляла, што 21 студзеня ў населеным пункце знікла мабільная сувязь ва ўсіх уладальнікаў кнопкавых тэлефонаў. І копія пісьма Галіны Генадзьеўны, і крытычны артыкул карэспандэнта былі накіраваны на рэагаванне ў кампанію МТС.
Адзначу, што адказ на свой зварот газета атрымала аператыўна. У ім тлумачыцца, што сумеснае таварыства з абмежаванай адказнасцю «Мабільныя ТэлеСістэмы» было вымушана дэманціраваць базавую станцыю 2G/3G, якая знаходзілася на трубе кацельні. Прычына — у арэндадаўцы трубы няма дакументаў, якія пацвярджалі б яго права ўласнасці на гэты аб’ект нерухомасці. Сотавую сувязь жыхарам Гуты павінна была забяспечыць базавая станцыя 3G, якая ўсталявана на нядаўна пабудаванай 72-метровай мачце.
Вось толькі ніхто не ўлічыў тое, што вясковыя пенсіянеры ў адрозненне ад гарадскіх аддаюць перавагу кнопкавым тэлефонам, сігнал якіх і забяспечвала тэхналогія 2G. Усвядоміўшы яе запатрабаванасць сярод гутчан, кампанія вырашыла ўсталяваць базавую станцыю стандарту 2G GSM-900 МГц на новую мачту ў тэрмін да 28 лютага. Ліст абнадзеіў. Яшчэ больш узрадавала навіна пра тое, што ў аўторак вечарам у Гуце «загаварылі» кнопкавыя тэлефоны, вярнуўся з падаконніка на прылавак плацежны тэрмінал у магазіне «Ивушка». Людзі вельмі задаволеныя. «Але ці надоўга?» — задаю сабе пытанне, атрымаўшы яшчэ адзін ліст ад МТС.
За подпісам генеральнага дырэктара кампаніі Уладзіслава Андрэйчанкі паведамляецца, што ў сувязі з сусветнымі тэхналагічнымі тэндэнцыямі і галіновым падыходам ідзе паступовае адмаўленне ад састарэлай тэхналогіі 2G на карысць больш эфектыўных: 3G, 4G, NB IoT, а ў перспектыве і 5G. «У гэтай сувязі МТС ажыццяўляе паступовае скарачэнне сеткі сотавай рухомай электрасувязі тэхналогіі 2G і разглядае магчымасць цалкам адмовіцца ад яе ў блізкай перспектыве, — інфармуе Уладзіслаў Андрэйчанка. — Пасля адмовы ад тэхналогіі 2G на тэрыторыі Рэспублікі Беларусь абанентам будзе неабходна выкарыстоўваць замест кнопкавых тэлефонаў смартфоны».
Наколькі перспектыва блізкая, не паведамляецца.
Вераніка Філановіч
