Новыя тэхналогіі, збалансаванае кармленне – залог поспеху ў жывёлагадоўлі ААТ «Хацілы-агра»
Такую выснову зрабілі ўдзельнікі калегіі камітэта па сельскай гаспадарцы і харчаванні Віцебскага аблвыканкама, якая прайшла на мінулым тыдні на базе нашага раёна.
— Пляцоўкай для вывучэння арганізацыі вытворчасці жывёлагадоўчай прадукцыі Пастаўскі раён выбраны невыпадкова. Тут ёсць чаму павучыцца, — зазначыў намеснік старшыні аблвыканкама Барыс Яфрэмаў. — Станоўчым прыкладам для ўсіх па ўтрыманні і кармленні жывёлы, якасці і надоях малака служыць сельгаспрадпрыемства «Хацілы-агра».
З 2010 года ў гаспадарцы функцыянуе адна з першых пабудаваных у вобласці рабатызаваная ферма. На яе ўзвядзенне затрацілі 23 мільёны недамінаваных рублёў, у іх ліку крэдыты, уласныя сродкі. Па папярэдніх падліках, будаўніцтва павінна было акупіцца за 12 гадоў. На практыцы тэрмін значна скараціўся.
У канцы 2020 года ў ААТ «Хацілы-агра» завяршылі ўзвядзенне яшчэ адной малочнатаварнай фермы з 6 памяшканняў, прызначаных для ўтрымання цялят, дойных і сухастойных кароў, з радзільнай і даільнай заламі. Тут ёсць свае падстанцыя і станцыя абезжалезвання, вялікія траншэі для закладкі сенажу і сіласу. Да гэтага дойны статак размяшчаўся на 6 фермах з прывязным утрыманнем. Пасля таго як увялі ў эксплуатацыю сучасны комплекс, засталіся 2 фермы. Старыя памяшканні рэканструююць пад цялятнікі.
Новая ферма напаўнялася паступова. Цяпер тут утрымліваецца 1 200 галоў буйной рагатай жывёлы, з іх — 829 кароў. Тых, што ў запуску і пасля ацёлу, размяшчаюць у адным памяшканні, а затым пераводзяць у кароўнік. Адтуль два разы на дзень партыямі па 40 галоў яны прыходзяць у даільную залу. Аператары, перш чым падключыць даільны апарат, апрацоўваюць вымя спецыяльнымі сродкамі, выціраюць асобнай сурвэткай, сцэджваюць малако. Яно праходзіць праз фільтр пярвічнай ачысткі і паступае ў танк-ахаладжальнік. Пасля заканчэння працэсу даільны апарат адключаецца аўтаматычна. Выдаеныя каровы ідуць у кароўнік, а на змену ім у даільную залу прыходзяць іншыя.
За мінулы год сярэдні надой малака ад кожнай каровы склаў амаль 8 520 кілаграмаў. З малочнатаварнага комплексу на Пастаўскі малочны завод штодня паступае 34 тоны малака. Усё — сортам «экстра». Рэнтабельнасць ад яго рэалізацыі па гаспадарцы за мінулы год склала 42%. Такія паказчыкі — вынік гаспадарчага падыходу да арганізацыі вытворчага працэсу, адказнасці і зацікаўленасці саміх работнікаў. Тут пад пільным кантролем спецыялістаў — здароўе кароў. Дойны статак своечасова абследуецца на розныя захворванні, праводзіцца вакцынацыя. Аператары дасканала выконваюць гігіенічныя патрабаванні. Рэгулярна праводзіцца тэхнічнае абслугоўванне даільнага абсталявання.
Для дасягнення высокіх паказчыкаў немалаважным з’яўляецца правільнае збалансаванае кармленне жывёлы. Для гэтага тут даследуюць кармы на пажыўнасць, па яго выніках складаюць рацыён з неабходнай колькасцю вітамінаў і мінералаў. А гэта 9 кілаграмаў камбікорму, 35 — сіласу, 15 — сенажу на адну карову.
У камфортных умовах утрымліваюцца цяляты-малочнікі. У кожнага — індывідуальны домік. Для маладняку таксама распрацавана сістэма кармлення. У групу дарошчвання цяляты пераводзяцца ва ўзросце прыкладна 2-х месяцаў пры вазе 88—93 кілаграмы.
Вялікая ўвага ў ААТ «Хацілы-агра» ўдзяляецца своечасоваму асемяненню жывёлы. Пасля ацёлу за каровай назіраюць аператары, ветурач, асемянатар. Сэрвіс-перыяд складае 91 дзень. Асемяненне праводзіцца пачынаючы з 55-га па 90-ы. З першага разу пакрываюцца 72% кароў. За мінулы год тут атрымалі 109 цялят ад 100 галоў матачнага статка.
На ферме «Волахі» з сучаснай даільнай залай працуе 21 чалавек: загадчыца, 8 аператараў машыннага даення і адзін — па доглядзе цялят, 6 жывёлаводаў, 3 слесары, ветурач, асемянатар.
— Для параўнання вазьміце звычайную ферму, на якой утрымліваецца да 300 кароў, — гаварыў Барыс Яфрэмаў. — На яе абслугоўванні практычна столькі ж людзей, толькі валавая вытворчасць, сабекошт прадукцыі далёкія ад хацілаўскіх. Таму мы не першы год арыентуем кіраўнікоў раёнаў, сельгаспрадпрыемстваў на ўзвядзенне менавіта такіх комплексаў. За імі — будучыня.
Анна Анішкевіч
