Натуральная, якасная — так ацэньваюць прадукцыю Пастаўскага малочнага завода яе спажыўцы.
Каб малако, смятана, масла, кефір, ражанка, вяршкі, сыры адпавядалі стандартам, работнікі прадпрыемства прыкладваюць нямала намаганняў. Маніторынг якасці прадукцыі — працэс пастаянны.
— Пярвічная праверка малака пачынаецца яшчэ на фермах, — расказвала інжынер-хімік малочнага завода Вольга Нараб. — Там лабаранты бяруць пробы на кіслотнасць, шчыльнасць, сортнасць. Правяраюць малако на наяўнасць саматычных клетак і антыбіётыкаў. Калi яны выяўляюцца, то работнікі нашай лабараторыі кантролю сыравіны не прымуць такое малако.
Пасля праверкі малако ў залежнасці ад сорту дзеліцца і зліваецца ў танкі (спецыяльныя рэзервуары), праходзіць праз ачышчальнік, пастэрызуецца ў апаратным цэху. І пасля гэтага зноў праводзіцца мікрабіялагічны аналіз. Згодна з заяўкай на выраб гатовай прадукцыі, малако адпраўляецца ў розныя цэхі (у залежнасці ад віду прадукцыі). Лабаранты кантралююць прадукт на ўсіх этапах вытворчага працэсу — ад прыёмкi сыравiны да адгрузкі гатовай прадукцыi.
Трапіць на завод можна толькі ў адпаведнай экіпіроўцы: спецыяльным халаце, шапачцы, бахілах. Санітарна-прапускны пункт аснашчаны турнікетам, які не прапусціць, пакуль не будуць належным чынам апрацаваныя рукі. У цэхах стэрыльна. Вялікая ўвага надаецца дэзынфекцыі абсталявання. Яна праводзіцца бясшкоднымі для здароўя чалавека сродкамі. Большасць працэсаў аўтаматызаваныя.
— Сёння пакупнікі аддаюць перавагу натуральным прадуктам высокай якасці, — гаварыла галоўны тэхнолаг Пастаўскага малочнага завода Святлана Германовіч. — Прадукцыя нашага завода поўнасцю адпавядае стандартам. Яна выпускаецца ў зручнай упакоўцы. На прадпрыемстве распрацаваны і дзейнічаюць усе неабходныя сістэмы менеджменту якасці і бяспекі прадукцыі. Маем адпаведныя сертыфікаты, якія дазваляюць асвойваць новыя рынкі збыту.
Больш за 60% прадукцыі пад гандлёвай маркай «Паставы-гарадок» адпраўляецца на экспарт у Расійскую Федэрацыю, Казахстан, Узбекістан. Хутка разбіраецца з прылаўкаў магазінаў нашага раёна, вобласці і гандлёвых сетак «Карона», «Еўраопт», «Суседзі» і іншых. Кожны год многія віды прадукцыі завадчане прадстаўляюць на розных выставах, конкурсах і заваёўваюць дыпломы. Залогам паспяховай работы завода з’яўляецца зладжаная работа ўсіх яго падраздзяленняў. Кожны спецыяліст на сваім рабочым месцы ўносіць асабісты ўклад у агульную справу і садзейнічае эфектыўнай рабоце прадпрыемства.
Анна Анішкевіч. Фота аўтара
